Ang Komite sang Sanga sa Brazil nag-organisar sing 18 ka Disaster Relief Committee (DRC) para buligan ang mga manugbantala nga nagaeksperiensia sing grabe nga kapigaduhon bangod sang coronavirus nga pandemic. Mga 12,000 ka kongregasyon sa bilog nga pungsod ang ginabuligan sang mga DRC, lakip ang aton mga kauturan nga nagaistar sa malayo nga mga lugar sa Amazon River. Subong, 131 ka pamilya sa Amazon ang nakabaton na sang bulig.

Ang DRC sa Manaus, ang kapital sang estado sang Amazonas, namutos sang mga suplay nga makaigo sa isa ka bulan nga kinahanglanon sang isa ka pamilya. Ang kada putos may unod nga mga beans, harina, bugas, gatas nga powder, habon, toilet paper, toothbrush, kag toothpaste. Gindala sang mga kauturan ini nga mga suplay asta sa malapit nga pantalan sang Manacapuru kag ginkarga ini sa lantsa para mapanagtag sa malayo nga mga lugar, pareho sang Membeca kag Lago do Castanho.

Si Sister Marinelma, nga nagaistar sa rehiyon sang Lago do Castanho nga nakabaton sang mga suplay sang pagkaon, nagsiling: “Una sa tanan, nagapasalamat gid ako kay Jehova kay ginaatipan gid niya kami. Kinahanglan gid namon ang bulig kay wala kami sing inugbakal sang pagkaon. Ginapasalamatan ko man ang kaalwan kag pagpalangga sang mga kauturan. Sang ginabuksan ko kag ginahimos ang nabaton namon nga suplay, nakita ako sang akon anom ka tuig nga bata. Ginsilingan ko sia nga gingamit ni Jehova ang mga kauturan para buligan kami. Dayon nagsiling ang bata ko sa akon, ‘Mangamuyo kita ’Nay para pasalamatan si Jehova.’”

Si Brother Jonas Monteiro, nga nagaistar sa siudad sang Caapiranga upod ang iya pamilya, nagsulat sa DRC. Ang bahin sang iya sulat nagasiling: “Salamat gid sa inyo bulig. Nabatyagan namon ang pagpalangga ni Jehova paagi sa inyo bulig. Daku gid nga pribilehiyo nga mangin bahin sining bug-os kalibutan nga pamilya.”

Bisan ang mga kauturan nga nagaalagad sa DRC napalig-on man. Si Isaac Emannuel Ramalho de Oliveira, nga isa ka gulang nga nagaalagad sa DRC, nagsiling: “Sa akon pagboluntaryo sa Disaster Relief Committee, adlaw-adlaw ko nga mabatyagan nga nagabakod ang akon pagtuo. Sigurado ako nga mas daku ang mabulig sini sa akon sangsa mabulig ko sa mga kauturan.”

Nagabakod gid ang aton pagtuo nga makita kon paano ginaatipan ni Jehova ang iya mga alagad sa sining tion sang pandemic, bisan diin man sila.—Salmo 94:14.