Sugod sang Enero 18, 2020, ang mga estado sang Brazil nga Espírito Santo kag Minas Gerais nakaeksperiensia sang sigesige kag mabaskog nga pag-ulan nga nagresulta sa makahalalit nga baha. Ang makusog nga baha nga nag-agi sa mga dalan naghalit sa mga pamalay, nag-anod sa mga salakyan, kag nagluka sa mga kahoy. Suno sa mga awtoridad, linibo ang nagbiya sang ila mga balay kag sobra 60 ka tawo ang napatay.

Sa mga banwa sang Iconha kag Alfredo Chaves, siam ka balay sang mga Saksi ni Jehova ang nahalitan sang baha, kag 27 naton ka kauturan ang naapektuhan. Maayo lang kay wala sang bisan isa ka utod nga nasamaran ukon napatay.

Mga 100 ka Saksi halin sa sini nga rehiyon ang nagboluntaryo para magbulig sa mga kauturan nga nabahaan. Gin-organisar sang mga gulang ang pagpanagtag sang mga pagkaon, tubig, kag bayo nga gin-donate sang mga kauturan. Nagbulig man sila sa pagtinlo kag pagkuha sang lunang sa balay sang mga kauturan kag sang ila mga kaingod.

Wala sang isa sa aton kauturan ang nasamaran ukon napatay. Pero lima ka Kingdom Hall ang nahalitan kag mga 50 ka Saksi nga pamilya ang nagbiya sang ila balay. May pila ka kauturan nga na-trap sa second floor sang ila mga balay bangod madasig nagdalom ang baha kag gin-rescue sila paagi sa baruto. Ang tanan nga kauturan nga nagbakwit nagdayon anay sa balay sang iban nga kauturan.

May gin-asayn na nga mga Disaster Relief Committee sa Espírito Santo kag Minas Gerais para dumalahan ang paghatag sang bulig. Ini nga mga Disaster Relief Committee nagapanghikot upod sa mga manugtatap sang sirkito kag mga gulang para atipanon ang pisikal kag espirituwal nga mga kinahanglanon sang mga kauturan.

Padayon kita nga nagapangamuyo para sa aton mga kauturan nga naapektuhan sang baha. Nagapasalamat kita kay Jehova kay ginahatagan niya sila sing kusog, paumpaw, kag praktikal nga bulig paagi sa aton Cristianong paghiliutod.—Salmo 28:7.