Sang Hunyo 23, 1947, ginparehistro sang mga Saksi ni Jehova ang Sociedade Torre de Vigia de Bíblias e Tratados (Watch Tower Bible and Tract Society) sa Brazil. Amo ini ang panguna nga legal nga korporasyon nga gingamit sa Brazil sa sulod na sang 75 ka tuig. Pero, ginbatas anay sang aton mga kauturan ang malawig nga paghingabot antes sila narehistro sa pungsod.

Sang Oktubre 13, 1945, ang mga Saksi ni Jehova sa Brazil nagpanagtag sang petisyon para buligan sila sang mga tawo nga kilalahon sila sang gobierno bilang isa ka relihion. Sa bilog nga pungsod, ang mga 400 ka manugbantala nakatipon sing 44,411 ka pirma. Ginpadala nila ang petisyon sa presidente sang pungsod pero wala sila nakabaton sang sabat.

Sang 1946, ginpatuman ang bag-o nga konstitusyon sa Brazil. Ini nga konstitusyon may mga kasuguan nga nagatugot nga marehistro ang Watch Tower Bible and Tract Society. Sina nga tuig, may average nga 442 ka manugbantala nga naga-preaching sa bilog nga pungsod kada bulan.

Wala nalipay sa sini ang mga lider sang iban nga mga relihion. Pagligad sang tatlo ka tuig, sang Nobiembre 3, 1949, naengganyo sining mga lider sang mga relihion ang presidente sang Brazil nga pirmahan ang isa ka mando para i-suspend kag ipasira ang Watch Tower Society. Bangod sini, nagpasaka sing kaso sa korte ang mga kauturan. Nagpadayon ang kaso asta sang Abril 8, 1957, sang nagdesisyon ang bag-o nga presidente pabor sa Watch Tower Bible and Tract Society.

Bisan pa madamo sing kabudlayan ang mga kauturan antes sila narehistro, padayon nga ginpakamaayo ni Jehova ang ila pagbantala. Si Brother Djalma Mendes Souto, nga nabawtismuhan sang 1941 kag isa sa una nga miembro sang Watch Tower Society sa Brazil, nagsiling: “Wala nagluya ang amon pagtuo, ang amon handum nga magbantala, kag ang amon pagsalig kay Jehova. Kag bangod sini, padayon nga nagdamo ang mga manugbantala. Nalipay gid kami kay sang 1947, sa una nga tion nalab-ot namon ang 1,000 ka manugbantala.”

Sugod sadto, kadasig sang pagdamo sang mga Saksi ni Jehova sa Brazil. Sang 2021, nalab-ot sang Brazil ang kadamuon nga 913,479 ka manugbantala kag 2,184,856 ang nag-attend sa Memoryal sang kamatayon ni Jesus. Ang 2021 nga “Mabakod Bangod sang Pagtuo!” nga Kombension gin-translate sa 15 ka lenguahe, lakip ang 10 ka nitibo nga lenguahe.

Napalig-on gid kita kay padayon nga ginapakamaayo ni Jehova ang hilikuton sa Brazil. Ang pagbatas sang aton mga kauturan bisan pa sang mga kabudlayan antes sila narehistro ebidensia nga ginaluwas ni Jehova ang mga nagasalig sa iya.—Isaias 25:9.