Sang Nobiembre 10, 2020, ang European Court of Human Rights (ECHR) nagdesisyon nga ginlapas sang gobierno sang Bulgaria ang kinamatarong sa kahilwayan sang relihion sang aton mga kauturan. Buot silingon sini nga desisyon, dapat pasugtan sang mga awtoridad nga padayunon ang pagpatindog sang Kingdom Hall sa siudad sang Varna sa Bulgaria. Ini nga proyekto sobra na pulo ka tuig pero wala gihapon matapos bangod sa paghingabot. Dugang pa, ginmanduan man sang ECHR ang Bulgaria nga bayaran sing 9,600 euros ($11,500 U.S.) nga danyos ang mga kauturan.

Ini nga kaso parte sa pagpatindog sang Kingdom Hall sa isa ka propiedad nga ginbakal sang aton mga kauturan sang Enero 2006. Sang Mayo 2007, ang mga awtoridad sang Varna naghatag sing permit para sa konstruksion, kag gilayon ini nga ginsugdan sang aton mga kauturan. Pero sang Hulyo sina nga tuig, ang meyor nagsiling nga may nalapas ang mga kauturan sa ila pagpatindog gani ginpauntat ang konstruksion. Sina man nga bulan, ang isa ka kilala nga nasyonalista nga partido pulitika sa Bulgaria nagbutang sing mga poster sa site sang Kingdom Hall kag ginpangunahan nila ang pagprotesta batok sa sini nga proyekto.

Suno sa desisyon sang ECHR, ang mga awtoridad sang Varna nagpagua sang isa ka deklarasyon nga nagapasipala sa mga Saksi ni Jehova, kag ila man “bug-os nga ginsuportahan ang mga nagprotesta.” Sa iya pahayag sa media, maathag man nga ginhambal sang meyor ang iya pagsuporta sa mga nagprotesta.

Bisan pa nga maathag ang ila diskriminasyon, ang meyor kag ang iban pa nga mga opisyales nagsiling nga ginabalabagan nila ang konstruksion bangod sa isyu parte sa zoning regulations kag indi bangod sa diskriminasyon sa relihion.

Ang aton mga kauturan madamo nga beses na nga nagpasaka sang appeal sa mga korte sa Bulgaria, pati sa Supreme Administrative Court. Pero wala sila gihapon ginpasugtan nga tapuson ang Kingdom Hall. Gani sa sini nga mga tion, ang kongregasyon kinahanglan nga mag-arkila sang pasilidad para sa ila mga miting.

Ang ECHR nagsiling nga wala sing basihan ang ginhimo sang mga opisyales. Ang Korte nagboto sing 6-1 kag nagsiling nga bangod sa pagpauntat sa pagpatindog sang Kingdom Hall, ginlapas sang Varna ang “kinamatarong sa kahilwayan sang panghunahuna, konsiensia kag relihion” nga ginagarantiyahan sang Artikulo 9 kag 11 sang European Convention on Human Rights.

Nagalaum ang aton mga kauturan nga sundon na sang mga opisyales sang siudad sang Varna ang desisyon sang ECHR kag pasugtan na sila nga tapuson ang pagpatindog sang isa ka tilipunan para sa pagsimba. Makabenepisyo gid sa sini ang komunidad kag madayaw ang ngalan ni Jehova sa siudad sang Varna. Ginapasalamatan gid naton si Jehova sa iya padayon nga pagpangapin sa aton.—Salmo 54:4.