Sang Marso 2019, ang Supreme Court of Cassation sang Bulgaria, ang pinakamataas nga korte sang pungsod, nagpapanaug sang desisyon nga pabor sa tatlo ka kaso nga nagadalahig sa aton mga kauturan. Ini nga mga kadalag-an nagpahamtang sang importante nga sulundan nga makabulig para maamligan ang kahilwayan sa pagsimba sang aton kauturan sa sini nga pungsod.

Duha sa sini nga mga kaso amo ang pagpasipala sang media sa aton kauturan. Sang 2012, ang newspaper nga Vseki Den nagbalhag sang artikulo nga puno sang kabutigan parte sa aton mga pagpati. Kag sang 2014, ang estasyon nga SKAT TV nagpagua man sang butig nga mga report parte sa aton organisasyon. Sa sining duha ka kaso, pareho nga wala ginpamatian sang media ang pangabay sang aton kauturan nga bawion ang ila negatibo nga report. Pagtapos sang madamo nga kaso sa korte kag mga appeal, ini nga mga kaso nakalab-ot sa Supreme Court. Sang Marso 18, 2019, ang Supreme Court nagdesisyon batok sa SKAT TV. Sang Marso 26, gingamit sang Korte ini nga desisyon nga basihan para manabat ang Vseki Den, kay ang ginhimo sini ginpakamalaut kag ginlaragway sang Korte bilang “lenguahe sang pagdumot.”

Ang ikatlo nga kaso amo ang parte sa mapintas nga paghingabot sa aton kauturan sang isa ka grupo sa pulitika nga ginatawag VMRO-Bulgarian National Movement. Sang Abril 17, 2011, ang aton kauturan nagtipon para dumdumon ang Memoryal sang kamatayon ni Jesus. Ang mapintas nga guban sang 60 ka tawo, nga gin-organisar sang lider sini nga si Georgi Drakaliev sang VMRO, mapintas nga nag-atake sa aton kauturan, amo nga may mga napilasan. Ginpasaka sang kauturan ini nga kaso sa mga korte, asta nga nakalab-ot ini sa Supreme Court. Sang Marso 20, 2019, ang Korte nagdesisyon batok kay Mr. Drakaliev, kag ginmanduan sia nga bayaran ang mga kauturan.

Nalipay gid kita sa sining tatlo ka desisyon nga pabor sa aton. Ining mga desisyon magamit na subong bilang basihan para amligan ang kahilwayan sang aton kauturan nga ‘magkabuhi sing matawhay kag malinong nga may bug-os nga diosnon nga debosyon.’—1 Timoteo 2:2.