Sugod pa sang 1888, may mga Saksi ni Jehova na sa Bulgaria. Sang 1938, nagparehistro sila bilang isa ka legal nga korporasyon sa pungsod pero ginkanselar ini sang ginkontrol sang mga Komunista ang pungsod sang 1944. Grabe nga kabudlayan ang naagyan sang mga Saksi asta sang 1991, sang narehistro liwat ang ila legal nga korporasyon nga Christian Association of Jehovah’s Witnesses. Pero sang 1994, pagkatapos sang pagpangampanya kontra sa “indi tradisyonal” nga mga relihion kag sa estrikto katama nga kasuguan sa relihion, ginkanselar ang rehistro sang mga Saksi ni Jehova kag sang iban pa nga gagmay nga grupo sang relihion. Sang ulihi, gin-aresto sang mga pulis ang mga Saksi, ginagamo ang ila mga pagtilipon para magsimba, kag ginakumpiskar ang ila mga literatura. Wala gid sang ginhatag nga proteksion sa mga Saksi ang mga korte sa Bulgaria.

Sa tapos mahimo sang mga Saksi ang tanan para masolusyunan ini nga mga isyu sa pungsod, nangayo sang bulig ang mga Saksi sa European Court of Human Rights (ECHR). Sang 1998, 2001, kag 2004, ginpasugtan sang ECHR ang mainabyanon nga paghusay sa tunga sang mga Saksi kag sang gobierno sang Bulgaria. Pagkatapos sini nga paghusay, ginrehistro liwat sang gobierno ang mga Saksi ni Jehova bilang isa ka relihion. Ginsuportahan man sini ang ila kinamatarong sa hilway nga pagsimba, lakip na ang kinamatarong nga magpangindi nga magsoldado bangod sa konsiensia, ang kinamatarong nga maghimo sang alternative civilian service, kag ang kinamatarong nga indi pagpunggan sa pagsugid sang ila mga ginapatihan sa iban.

Nagapasalamat gid ang mga Saksi ni Jehova sa Bulgaria kay hilway sila sa pagsimba kag mahimo nila ang mga hilikuton sang ila relihion. Pero, sa pila ka banwa, ginaestriktuhan gihapon ang hilikuton sang mga Saksi, paagi sa sala nga pag-aplikar sang lokal nga kasuguan sa ila pagbantala ukon indi paghatag sa ila sang zoning permit para sa ila mga Kingdom Hall. Dugang pa, may mga bes nga ginasakit kag gina-harass sang pila ka pumuluyo ang mga Saksi ni Jehova. Nagabulig man ang mga pulis sa mga Saksi, pero sa masami wala nila ginakasuhan ang mga nagapanakit kag wala man nila ginaproteksionan ang mga biktima. Padayon nga nagapakig-istorya ang mga Saksi sa mga opisyal sang Bulgaria para masolbar ini nga mga isyu, kag ang isa ka kaso parte sa permit sang Kingdom Hall naka-pending na sa ECHR.