Sang Marso 19, 2023, gin-release ni Brother Youssouf Ouedraogo, miembro sang Branch Committee sa Benin, ang Bag-ong Kalibutan nga Badbad sang Balaan nga Kasulatan sa Moore nga lenguahe. Ginpahibalo ini nga pag-release sa isa ka live nga programa sa Ouagadougou, ang kapital nga siudad sang Burkina Faso. a Madamo ang nag-tie in sa sini nga programa sa iban nga siudad. Ang kabilugan nga nag-attend sa sini nga programa sobra 1,730. Pagkatapos sini nga release, ginpanagtag dayon ang naimprinta nga kopya sa mga nag-attend sing face-to-face kag ang digital nga pormat puede na ma-download.

Ang Moore amo ang lenguahe nga ginahambal sang kalabanan sa Burkina Faso. Mga walo ka milyon ka tawo ang nagahambal sini. Ginahambal man ini sa kaingod nga mga pungsod nga Côte d’Ivoire, Ghana, Mali, Senegal, kag Togo.

Amo ini ang una nga bes nga na-translate sang mga Saksi ni Jehova ang kompleto nga Biblia sa lokal nga lenguahe sa Burkina Faso. Bisan pa may iban man nga translation sang Biblia sa Moore, indi mabasa sa sini ang ngalan sang Dios nga Jehova.

Ang isa ka translator nagsiling: “Ang iban nga mga libro sang binalaybay, pareho sang Hulubaton kag Ambahanon ni Solomon, kabudlay gid i-translate kay ina nga klase sang binalaybay indi natural sa Moore. Pero, sa tapos namon ini ma-translate, daw indi kami makapati kag nalipay gid kay ang mensahe sini nga mga libro mahapos na maintiendihan!”

Nagakalipay kita upod sa aton mga kauturan nga nagahambal sang Moore sa sining regalo halin kay Jehova.—Santiago 1:17.