Sang Oktubre 1, 2022, gin-release ni Brother Stephen Attoh, miembro sang Branch Committee sa Cameroon, ang digital format sang Bag-ong Kalibutan nga Badbad sang Balaan nga Kasulatan sa Bassa (Cameroon). Ini nga Biblia gin-release paagi sa isa ka narekord na nga daan nga programa kag gin-stream sa mga tumalambong. Ang naimprinta nga edisyon sini nga Biblia mahimo mangin available sa Abril 2023. Amo ini ang una nga lenguahe sa Cameroon nga may na-translate nga kompleto nga Biblia ang mga Saksi ni Jehova. Sang 2019, gin-release sang mga Saksi ang Cristianong Griegong Kasulatan sa Bassa (Cameroon).

Antes sini nga release, available na ang iban nga translation sang kompleto nga Biblia sa Bassa (Cameroon). Pero wala halos sang mabaklan sini nga mga translation kag mahal ini kaayo kag sa masami nagagamit ini sang dinumaan na nga tinaga. Ang isa ka translator nagsiling: “Bangod sini nga release, mas mahapos na para sa mga interesado nga makatigayon sang ila kaugalingon nga Biblia. Mas maintiendihan man nila ang simple kag moderno nga lenguahe sini.”

Nalipay kita nga ang aton mga kauturan nga nagahambal sang Bassa (Cameroon) may kompleto na nga Bag-ong Kalibutan nga Badbad. Magamit nila ini sa ila personal nga pagtuon kag sa pagpangita sang mga takus nga tawo sa ila pagministeryo.—Mateo 10:11.