Ginpagua sang mga Saksi ni Jehova sa lenguahe nga Bassa ang Bag-ong Kalibutan nga Badbad Sang Cristianong Griegong Kasulatan sa isa ka rehiyonal nga kombension sa Douala, Cameroon, sang Agosto 2, 2019. Ini nga translation ginpagua pagkatapos sang 18 ka bulan nga pagpangabudlay. Amo ini ang una nga tion nga ang mga Saksi ni Jehova nag-translate sang Biblia sa tumandok nga lenguahe sa Cameroon.

Si Brother Peter Canning, nga miembro sang Komite sang Sanga sa Cameroon, amo ang nagpagua sang Biblia sa una nga adlaw sang rehiyonal nga kombension sa Logbessou Assembly Hall, nga gintambungan sang 2,015.

Antes ginpagua ining Griegong Kasulatan, ang aton kauturan nga nagahambal sing Bassa nagagamit sang isa ka translation nga mabudlay intiendihon kag tuman kamahal. Ang isa sa mga translator sa sini nga lenguahe, nagsiling: “Ining bag-o nga translation makabulig para mas maintiendihan sang kauturan ang Biblia kag para magdalom pa gid ang ila gugma kay Jehova kag sa iya organisasyon.”

Ginabulubanta nga mga 300,000 ang nagahambal sang lenguahe nga Bassa sa Cameroon. Sa teritoryo nga ginadumalahan sang Cameroon, may 1,909 ka manugbantala nga nagahambal sini nga lenguahe.

Nagasalig kami nga ining sibu kag mahapos intiendihon nga translation makabulig sa mga bumalasa nga makita nga “ang pulong sang Dios buhi.”—Hebreo 4:12.