Sang Enero 20, 2020, ang pamilya Bethel sa Cameroon nagsaylo sa ila bag-o nga branch office sa Logbessou, sa aminhan-sidlangan sang siudad sang Douala. Subong, 59 ka mga kauturan ang nagaistar kag nagaobra sing bug-os tion sa bag-o nga pasilidad, kag 71 ang nagapulipuli sa ila balay.

Ang daan nga branch sang Cameroon ara sa Bonaberi, sa nakatundan nga siudad sang Douala. Ining pasilidad ginahuman sang mga bilding nga gin-renovate sang mga brother sang 1993 pagkatapos sang 23 ka tuig nga pag-ban sa aton organisasyon. Sugod sang 1993, ang mga manugbantala sa teritoryo sang Cameroon branch nagdamo halin sa 19,268 asta sa sobra 52,000, kag 29 na ka lenguahe ang gina-translate sang branch. Bangod sini, kinahanglan sang mga brother nga mangita sang bag-o kag mas daku nga pasilidad. *

Ang pasilidad sa branch himuan man sang visitor center, nga nakaiskedyul nga gamiton sa katapusan sang 2020. Butangan ini sang mga eksibit parte sa mga hilikuton sang branch kag sang kasaysayan sang pagbantala nga hilikuton sa Cameroon, Equatorial Guinea, kag Gabon.

Si Brother Stephen Attoh, nga miembro sang Komite sang Sanga sa Cameroon, nagsiling: “Sang nagsaylo kami sa sining bag-o kag matahom nga branch, pamatyag ko daw nagadamgo lang kami. Determinado kami nga ihatag kay Jehova ang amon pinakamaayo sa sining matahom nga lugar. Madamo gid sing ginhimo si Jehova para sa amon, kag malipayon gid kami nga nagapasalamat sa iya.”—Salmo 145:7.