Ang 27 ka manugbantala sang Iqaluit Congregation, sa Arctic Archipelago sang Canada, nagselebrar sang Memoryal paagi sa videoconference. Ini nga kongregasyon may 55 ka Bible study, kag 12 sa sini ang nakatan-aw sang pamulongpulong sa Memoryal kag nalipay gid sila nga nakatambong sila.

Para sa kalabanan sining Bible study, mabudlay gid ukon imposible pa gani ang pagtambong sang Memoryal. Nagaistar sila sa pinakamalayo nga teritoryo sang kongregasyon, nga nagalapad sing mga dos milyones kilometros kuadrados halin sa Kimmirut pakadto sa Grise Fiord, nga amo ang pinakanorte nga bahin sang Canada.

“Subong pa lang natabo nga nakatan-aw man ang amon mga Bible study sang programa sang Memoryal. Ang isa ka Bible study sa Grise Fiord nangagda man, amo nga may apat pa gid nga nagtambong, gani lima sila tanan ang nakatan-aw sang Memoryal sa pinakanorte sang kalibutan,” siling ni Brother Isaac Demeester, nga gulang sang Iqaluit Congregation.

Ining indi kinaandan nga sitwasyon nga resulta sang mga pagdumili bangod sang COVID-19 nga pandemic nakabulig sa madamo nga kauturan sa Iqaluit Congregation nga makita ang mga benepisyo kon mag-adjust kita suno sa kahimtangan.

Si Sister Kathy Burechailo nagsiling: “Ginaistorya namon ang mga tawo asta sa nasidlangan nga bahin sang Arctic paagi sa telepono. Madamo ako sang naistorya nga interesado sa pinakamalayo nga bahin sang amon teritoryo. Ara lang sa ila mga balay ang mga tawo kag nagapangita gid sila sing paumpaw.”

“Na-stress gid kami diri sa Iqaluit kay na-isolate kami kag pigado na gid kami sa pinansial, kag wala kami kabalo kon ano pa gid ang puede matabo,” siling ni Sister Laura McGregor. “First time sang amon pamilya nga maghimo sang tinapay para sa Memoryal. Nalipay kami nga makaupod ang isa kag isa. Naapresyar pa gid namon kon daw ano ka simple ini nga selebrasyon, kag isa gid ka pagpakamaayo nga hapos lang ipreparar ang tinapay kag alak.”

Si Brother Demeester nagsiling: “Bisan pa wala kami nakaupdanay bangod sang COVID-19 nga pandemic, kanami batyagon nga sa sining tion sang Memoryal, ang amon kongregasyon nangin mas suod pa gid. Ang Memoryal subong nga tuig nagpabag-o gid sang amon pagtamod sa kabuhi!”

Ang Iqaluit Congregation eksayted na nga magtukod sang ila kaugalingon nga Kingdom Hall sa palaabuton kon magtugot na ang kahimtangan. Samtang wala pa, kabalo kita nga pakamaayuhon ni Jehova ang ila mga panikasog nga ibantala ang maayong balita sa pinakanorte nga mga rehiyon sang Canada, nga isa sa pinakamalayo nga mga bahin sang kalibutan!—Binuhatan 1:8.