Si Brother Jean-Yves kag ang iya asawa nga si Vasthie Mudaheranwa mga frontliner sa sining tion sang coronavirus nga pandemic sa Montreal, Canada. Si Brother Mudaheranwa isa ka doktor sa isa ka community hospital kag si Sister Mudaheranwa isa ka nars sa isa ka ospital para sa mga may COVID-19. Sa sining tion nga madamo ang gina-stress kag ginakulbaan, si Brother kag si Sister Mudaheranwa padayon nga nagasalig nga hatagan sila ni Jehova sing kusog kag nabatyagan gid nila ang “maayo nga kahimtangan sang tagipusuon” nga ginpromisa ni Jehova.—Isaias 65:14.

“Madamo sa akon kaupod sa trabaho ang nahadlok gid, kag subong ko pa lang sila nakita nga amo sina,” siling ni Brother Mudaheranwa. “Daku gid ang bulig sang personal nga pagtuon,” siling ni Sister Mudaheranwa. “Ginapamalandungan namon ang tanda sang katapusan nga mga adlaw, kag ginapahanumdom ang amon kaugalingon nga kaupod namon si Jehova kag indi gid niya kami pagpabay-an. Daku man ang bulig sang pangamuyo. Antes ako maghalin sa balay para mag-obra, nagapangamuyo ako kag mabatyagan ko ang kalinong.”

“Halin ako sa Rwanda kag naeksperiensiahan ko ang pagpinatyanay didto bangod sang rasa,” siling ni Brother Mudaheranwa. “Diri sa Canada, wala kami kaagi sang pareho sina, gani kon kaisa malipatan namon nga nagakabuhi na kita sa katapusan nga mga adlaw. Bisan ako, wala pirme nagapensar nga amo na sini kalapit ang adlaw ni Jehova. Pero bangod sa pandemic, nangin kumbinsido gid ako nga nagakabuhi na kita sa katapusan nga mga adlaw, kag ginpabakod sini ang akon pagtuo sa Biblia kag sa mga tagna sini.”

Pareho ni Brother kag ni Sister Mudaheranwa, ang katawhan ni Jehova sa bilog nga kalibutan nagapabilin man nga kalmado kag may kalinong sa sining tion sang krisis.—Isaias 48:18.