Sang Hunyo 5, 2022, gin-release ni Brother Jason Reed, miembro sang Branch Committee sang Chile, ang digital kag naimprinta nga mga pormat sang Bag-ong Kalibutan nga Badbad Sang Cristianong Griegong Kasulatan sa Mapudungun. Gin-imbitar sa pag-attend sa programa paagi sa live stream ang mga kongregasyon nga nagahambal sing Mapudungun sa bilog nga pungsod. Halos 800 ang nagtambong.

Ang kalabanan sang mga Mapuche nagaistar sa central kag southern nga bahin sang Chile kag Argentina. Ini nga lugar may kagulangan, aktibo nga mga bulkan, kabukiran sang Andes, kag malapad nga kapatagan. Ang mga Mapuche maabiabihon nga mga tawo kag nagarespeto gid sa sagrado nga mga butang.

Ang mga bahin sang Biblia mabasa na sa Mapudungun nga lenguahe halin pa sang 1901, kag ang kompleto nga bersion sang Cristianong Griegong Kasulatan ginpagua sang isa ka Bible society sang 1997. Pero kinahanglan ang mas sibu nga translation. Halimbawa, ang 1997 nga bersion nagagamit sang tinaga nga gin-translate nga “krus” para ilaragway kon paano napatay si Jesus. Pero ang Bag-ong Kalibutan nga Badbad naggamit sang Mapudungun nga tinaga para sa “troso,” nga nagapakita nga napatay si Jesus sa usok.

Talalupangdon gid nga sang gin-release ang digital nga pormat sang Bag-ong Kalibutan nga Badbad, dungan man nga ginpanagtag ang naimprinta nga mga kopya sa kada isa nga nagtambong sa 23 ka Kingdom Hall sa diin gin-stream ang programa. Si Brother Jorge González, miembro sang Branch Committee sa Chile, nagsiling: “Sa masami ang mga Mapuche wala dayon nagapati sa sagrado nga impormasyon, pareho sang Pulong sang Dios, kon ara ini sa digital nga pormat. Gani ginapaabot namon nga madamo ang gusto sang naimprinta nga kopya sang Bag-ong Kalibutan nga Badbad Sang Cristianong Griegong Kasulatan sa Mapudungun.”

Nagapangamuyo kita nga ining gin-release nga Biblia magabulig sa madamo nga tawo halin sa “tanan nga pungsod” nga makilala si Jehova kag simbahon sia.—Isaias 2:2.