Sang Disiembre 13, 2019, paagi sa 3-2 nga boto, ginpaboran sang Supreme Court sa Chile ang kinamatarong sang isa ka Saksi ni Jehova nga indi magpatughong sang dugo bangod sa iya relihioso nga mga pagpati. Ginbag-o sang Supreme Court ang desisyon sang lower court.

Ang kaso parte sa isa naton ka sister nga si Polonia Ríos, nga pila ka beses nga ginpangindian nga operahan kay indi sia magpatughong sang dugo. Sang ulihi, nagpasaka sia sang reklamo batok sa pangpubliko nga ospital nga nangindi nga operahan sia. Sang Agosto 6, 2019, ang San Miguel Appeal Court nagdesisyon pabor sa ospital.

Bangod sini, nag-apelar si Sister Ríos sa Supreme Court sang Chile kag ginpaboran sia sang korte. Amo ini ang una nga bes nga nagdesisyon ang Supreme Court pabor sa mga kinamatarong sang adulto nga mga pasyente nga indi magbaton sang isa ka partikular nga pagbulong bangod sang ila relihioso nga mga pagpati. Sa sulod sang sobra 25 ka tuig, ang Korte nagadesisyon nga kon ang mga doktor nagapati nga ang isa ka sahi sang pagbulong magaluwas sa kabuhi sang pasyente, indi puede nga mangindi ang pasyente.

Suno sa isa ka bahin sang desisyon sang Korte, si Polonia Ríos “isa ka pasyente nga gusto gid mag-ayo kag mabuhi paagi sa pagpaopera, nga tatlo ka tuig na niya nga ginahulat . . . [Ang iya pagpangindi sa pagpatughong sang dugo] may maayo gid nga rason, kag wala nagakahulugan nga indi niya gusto magpabulong. Nagpangindi ang pasyente bangod sang iya relihioso nga pagpati nga dapat respetuhon bangod may kinamatarong sia nga sundon ang iya konsiensia kag dapat sia pakitaan sang dignidad. Mas dapat pa gid respetuhon ang iya desisyon bangod suno sa mga report, puede mahimo ang operasyon nga wala nagatughong sang dugo.”

Nagakalipay kita upod sa aton mga kauturan sa Chile kay nagdaug sila sa sining kaso.—1 Corinto 12:26.