Ang 2023 Pan American Games ginhiwat sa sarisari nga mga siudad sa Chile halin sang Oktubre 20 asta Nobiembre 5, 2023. Sobra 6,900 ka atleta halin sa 46 ka pungsod ang nag-entra sa sining internasyonal kag sarisari sing hampang nga okasyon. Halos 1,500 ka Saksi ni Jehova ang nagpartisipar sa sining espesyal nga preaching campaign sa tion sang hampang. Ginplastar ang mga cart nga may mga literatura sa English, Portuguese, kag Spanish. Maayo ang pagpakig-istorya sang aton mga utod sa mga atleta kag sa iban pa nga nag-attend.

Isa ka bes, ang isa ka sikat nga atleta nagpalapit sa cart. Nagsiling sia nga sang bata pa sia, naga-attend sia sa mga miting upod sa iya nanay. Bisan pa nagmanggaranon na sia paagi sa pag-entra sa sports, wala gid ini nakahatag sang kalipay kag pagkakontento nga ginapaabot niya. Pagkatapos ginbasa sang mga Saksi sa iya ang pila ka makapalig-on nga teksto sa Biblia, nagpasalamat sia sa makapaumpaw nga mensahe.

Ang isa ka pulis nga naga-attend man sa mga miting sang bata pa sia, nagpalapit sa aton cart. Nagsiling sia sa mga utod nga sang nakita niya sila, nadumduman niya ang maayo nga mga tion nga nagapakig-upod sia sa kongregasyon. Ginsugiran sia sang brother parte sa kongregasyon nga malapit sa iya kag ang iskedyul sang mga miting. Nalipay man sia sang nakabaton sia sang Biblia kag sang Magkabuhi sing Wala Katapusan! nga brosyur. Ang pulis nagsiling nga nalipay gid sia nga nakita niya liwat ang mga Saksi ni Jehova.

Ang isa ka 19 anyos nga babayi nga nakig-istorya sa sister sa cart nagsiling nga nangamuyo sia nga mabuligan sia nga maintiendihan ang Biblia. Sang ginsilingan sia sang sister nga ma-Bible study sila, malipayon sia nga nagsugot sa sini. Pagkahapon sina nga adlaw, nagsugod na sa pagtuon sang Biblia ang babayi, kag nagapadayon sia sa pagtuon asta subong.

Nagapasalamat gid kita sa aton mga kauturan sa Chile nga nagsuporta sa sining espesyal nga preaching campaign. Ang maayo nga resulta sang ila pagpangabudlay nagapamatuod nga padayon si Jehova nga nagapakamaayo sa mga nagapangita sa iya.—Isaias 55:6.