Sang Agosto 18, 2023, gin-release ni Brother Giacomo Maffei, miembro sang Branch Committee sa Colombia, ang Bag-ong Kalibutan nga Badbad Sang Cristianong Griegong Kasulatan sa Wayuunaiki nga lenguahe. Ginhimo ini sa tion sang “Mangin Mapinasensiahon”! nga Rehiyonal nga Kombension sa Maicao, La Guajira, Colombia. May 265 nga nag-attend sa programa. Puede na dayon ma-download ang digital nga pormat sini nga Biblia. Ang naimprinta nga kopya sini nga Biblia mabaton na sang mga kongregasyon sa una nga mga binulan sang 2024.

Ang Wayuunaiki ginahambal sang sobra 700,000 ka tawo, nga ginatawag mga Wayuu. Ang kalabanan sa ila nagaistar sa rehiyon sang La Guajira sa Colombia kag sa northern state sang Venezuela nga Zulia. Ginsugdan sang mga Saksi ni Jehova ang pag-translate sang mga publikasyon sa Wayuunaiki sang 1998. May remote translation office sa Riohacha, ang kapital sang La Guajira. May 445 ka manugbantala nga nagahambal sang Wayuunaiki sa 17 ka kongregasyon kag 4 ka group sa Colombia kag sa Venezuela.

Ang isa ka brother nagpasalamat para sa Bag-ong Kalibutan nga Badbad Sang Cristianong Griegong Kasulatan sa Wayuunaiki. Sia nagsiling: “Kanami gid nga regalo halin sa aton Amay sa langit nga makabaton sang sibu nga translation sang Biblia sa Wayuunaiki nga lenguahe!” Ang isa pa ka brother nagsiling: “Sigurado ako nga ini nga translation makabulig gid sa mga manugbasa nga mapabakod ang ila pagpakig-abyan kay Jehova.”

Nagasalig kita nga ining translation sang Biblia makahatag sang daku nga kalipay sa aton mga kauturan nga nagahambal sang Wayuunaiki kag makabulig sa iban pa nga makilala ang Dios.—Mateo 5:3.