ABRIL 26, 2019
COLOMBIA
Ang mga Saksi ni Jehova Ginpadunggan sa Ila Pagtudlo sing Biblia sa mga Priso sa Colombia
Ang certificate halin sa Paulo Freire Educational Center nga nagakilala sang mga benepisyo sang pagtudlo sing Biblia sa prisuhan sa Valledupar.
Sa sulod na sang sobra 20 ka tuig, ang aton kauturan sa Colombia nagatudlo sing Biblia sa mga priso. Sang Nobiembre 30, 2018, ang Paulo Freire Educational Center naghatag sing certificate of recognition sa mga Saksi ni Jehova para sa hilikuton nga pagtudlo sing Biblia sa prisuhan sa siudad sang Valledupar. Subong, 50 ka priso ang ginatudluan sing Biblia.
Sa bilog nga Colombia, ang mga Saksi ni Jehova nagatudlo sa 65 ka prisuhan, kag 782 ang ila ginatudluan sing Biblia. Sa kabilugan, 60 na ka indibiduwal ang nabawtismuhan sugod sang 1996.
Si Néver Antonio Cavadía nagtuon sing Biblia sa prisuhan kag isa na subong ka gulang sang kongregasyon. Upod niya diri ang iya asawa, nga si Lety Cavadía.
Si Néver Antonio Cavadía nagtuon sing Biblia sa prisuhan kag nabawtismuhan sang 1998. Nakagua sia sang ulihi sa prisuhan sa Valledupar sang 2007. Parte sa mga benepisyo sang iya pagtuon, sia nagsiling: “Ang mga prinsipio sang Biblia nag-amlig kag nagbulig sa akon nga magpakita sing praktikal nga kaalam samtang ara ako sa prisuhan. Nagpahulag man ini sa akon nga maghimo sing daku nga mga pagbag-o kag indi madulaan sing paglaum.”
Sa bilog nga kalibutan, nagapanikasog kita nga mabantalaan pati ang mga ara sa prisuhan kay kabubut-on ni Jehova “nga ang tanan nga sahi sang tawo maluwas kag makadangat sa sibu nga ihibalo tuhoy sa kamatuoran.”—1 Timoteo 2:4.
Basi Manamian Ka Man
PAGBULIG SA KOMUNIDAD
Priso Sadto, Sang Ulihi Nangin Maayo nga Tawo
Ginpaathag ni Donald, nga priso sadto, kon paano ang pagtuon sa Biblia nakabulig sa iya nga makilala ang Dios, maghimo sing mga pagbag-o sa iya kabuhi, kag mangin maayo nga bana.