Ang tuig 2022 amo ang ika-100 nga tuig sang mga Saksi ni Jehova sa Colombia. a

Sang 1922, si Heliodoro Hernández nga nanamian gid magbasa sang Biblia, naghulam sang pila ka kopya sang Ang Lalantawan nga magasin sa iya abyan nga indi Saksi ni Jehova. Naintiendihan dayon ni Heliodoro nga nakita na niya ang matuod nga relihion kag ginsugid man niya ini sa iban. Nagbantala sia sing duha ka tuig, asta nga nakilala niya si Juan Estupiñán, nga nangin kaupod niya sa pagbantala sang maayong balita. Dungan sila nga nabawtismuhan sang 1932.

Sang ulihi, ang Watchtower Society nagpadala sing de-battery nga transcription machine kay Brother Hernández kag kay Brother Estupiñán. Gingamit nila ini para mapatokar ang mga talk parte sa Biblia pareho sang “Ginbuyagyag ang Trinidad” kag “Katapusan sang Kalibutan,” sa mga komunidad sa bilog nga Andres Mountains. Pirme lang may nagakontra sa ila bangod sang impluwensia sang Catholic Church sa sini nga mga lugar.

Sang 1945, nag-abot ang mga misyonero nga nakaeskwela sa Gilead. Isa sa sini si Brother Olaf Olson, nga sang ulihi nagsiling sa istorya sang iya kabuhi: “Madamo sing karnero si Jehova diri, kag nagapasalamat kami nga ginpadala niya kami para buligan kag pahalbon ini nga mga karnero.”

Para maorganisar sing mas maayo ang hilikuton, may ginhimo nga branch office sa Colombia kag nagsugod ini sa pagpanghikot sang Mayo 1, 1946. Si Brother Arthur Green, ang una nga branch servant, nagsulat: “Sa bulig sang gamhanan nga espiritu ni Jehova, ang matuod nga pagsimba sa Colombia napasad na.”

Subong, may mga 190,000 ka Saksi ni Jehova nga mapisan nga nagabantala sang maayong balita sa Colombia.

Ang Colombia kilala sa matambok nga duta sini kag sa matahom nga mga gemstone. Pero ang matuod nga katahom sini ara sa “malahalon nga mga butang,” nga amo ang mga tawo nga padayon nga ginaagda ni Jehova nga magpalapit sa iya. Nalipay kita nga makita nga padayon nga ginapakamaayo ni Jehova ang pagbantala nga hilikuton nga ‘nagapuno sing himaya sa iya balay.’—Hageo 2:7.