Sang manugtapos na ang Abril 2021, nagsugod ang inaway kag kinagamo sa Colombia. Wala sing Saksi ni Jehova nga napatay ukon nahalitan sa sini. Pero sa pila ka lugar, apektado gid ang suplay sang pagkaon kag gasolina. Ginatinguhaan gid sang aton kauturan didto nga mabatas ining mabudlay nga sitwasyon bangod kulang ang pagkaon kag pati man ang epekto sang COVID-19 nga pandemic.

Para mabuligan ang aton mga kauturan, ang Branch Committee sa Colombia nag-asayn sang lima ka Disaster Relief Committee (DRC). Naghatag sila sing praktikal nga bulig samtang ginasunod nila ang ginapatuman nga mga protocol bangod sa COVID-19. Ang mga kauturan mismo nagabuligay para may makaon sila tanan. Ang mga gulang kag mga manugtatap sang sirkito nagahatag man sing pagpalig-on base sa Biblia sa mga kauturan nga naapektuhan.

Si Brother Almond Winklaar, nga nagabulig sa isa sang mga DRC, nagsiling: “Kabudlay gid sang amon sitwasyon subong. Nagapasalamat gid ako kay Jehova sa iya madasig nga pag-atipan sa iya mga alagad sa sining mabudlay nga tion.”

Sa La Loma Arena Congregation, 18 ka manugbantala kag ang ila mga pamilya ang nakabaton sang suplay nga pagkaon. Ang isa ka mag-asawa nga payunir sa sini nga kongregasyon, nagsiling: “Grabe gid ang amon kalipay sang nakabaton kami sang bulig halin sa Disaster Relief Committee. Sabat gid ini sa amon pangamuyo. Nagapasalamat gid kami sa amon mga kauturan nga naghatag sang amon mga kinahanglanon sa insakto gid nga tion. Nagapasalamat man kami kay Jehova sa pagbulig sa amon nga mangin mabakod kag makabatas.”

Ang mga nagaobra sa isa ka daku nga supermarket nga ginabaklan sang DRC sang mga suplay nagdayaw gid sa sini nga pagbulig. Ang isa sa mga nagaobra diri, nagsiling: “Bal-an ko nga ang mga Saksi ni Jehova nagapamalaybalay para magsugid sang mensahe parte sa Pulong sang Dios. Pero nagdayaw gid ako sa ila ginahimo nga pagbulig sa mga tawo nga nagakinahanglan.”

Bisan pa mabudlay ang ila sitwasyon, ang aton mga kauturan padayon gihapon sa ila regular nga mga hilikuton sang pagsimba kay Jehova. Kabalo kita nga ihatag ni Jehova ang materyal nga mga kinahanglanon kag ang pagpalig-on nga kinahanglan sang aton pinalangga nga mga kauturan, samtang padayon sila nga “indi bahin sang kalibutan.”—Juan 17:16.