Sang Enero 13 asta Pebrero 11, 2024, ang mga atleta halin sa bilog nga Africa nagpartisipar sa 34th Africa Cup of Nations, nga isa ka international soccer tournament. Ginhiwat ang event sa pungsod sang Côte d’Ivoire, kag linibo ka tawo halin sa 24 ka pungsod ang nagkadto sa sini nga event. Sa tion sang event, nagpartisipar ang mga Saksi ni Jehova sa pagbantala nga hilikuton para ibantala ang mensahe sang Biblia sa mga nag-attend sa sini nga event. Sobra 120 ka literature cart ang ginplastar sa lima ka dalagku nga siudad, diin ginhiwat ang mga hampang.

Sa Abidjan, may isa ka pamatan-on nga lalaki nga nag-istorya sa aton mga utod sa isa ka cart kag nagpakita sang interes sa brosyur nga Kon ang Isa nga Ginahigugma Mo Mapatay. Nagsiling ang lalaki nga ang suod niya nga abyan napatay sang nagligad lang. Pagkatapos mabasa sang aton mga utod ang makapaumpaw nga teksto sa Juan 5:28, 29, natandog gid ini nga lalaki. Ginsilingan niya dayon ang mga brother nga bisitahan sia sa iya balay para mapadayon ang ila pag-istoryahanay.

May isa man ka pulis sa Anyama nga nagpalapit sa isa sa aton mga cart. Ginsilingan niya ang mga Saksi nga nanamian sia magbasa sang aton base sa Biblia nga mga literatura, ilabi na sa mga topiko parte sa pagpanuga kag sa ginhalinan sang kabuhi. Bisan pa nagsiling sia nga masako sia, ginhatag niya ang iya contact number kag ginhambalan ang mga utod nga kontakon sia.

May isa man ka lalaki nga nagpalapit sa cart sa Abidjan kag nagsiling sa mga utod nga naka-Bible study sia upod sa mga Saksi ni Jehova sang pamatan-on pa sia, pero nauntat ini. Pagligad sang mga tinuig, nakita niya nga may kinalain gid ang mga Saksi ni Jehova sa iban nga mga relihion. Halimbawa, nanamian sia sa paghidait kag paghiusa sang katawhan ni Jehova sa tion sang kinagamo sa pulitika. Nangabay ang lalaki nga magpa-Bible study, kag subong may mga utod na nga naga-Bible study sa iya sing regular.

Nalipay kita nga ang aton mga kauturan sa Côte d’Ivoire may manami nga kahigayunan nga mabuligan ang mga tawo sa madamo nga pungsod nga mabatian ang “gamhanan nga mga binuhatan sang Dios.”—Binuhatan 2:11.