Sang Enero 20, 2024, ang mga libro sang Biblia nga Mateo kag Marcos gin-release sa Cuban Sign Language sa isa ka espesyal nga programa nga ginhiwat sa Guanabacoa Assembly Hall sa Havana, Cuba. Ang duha ka libro sang Biblia puede na dayon ma-download sa jw.org.

Mga 53,000 ka apa ang nagaistar sa bilog nga Cuba. Sa una nga mga tinuig sang dekada ’90, may ginhimo nga espesyal nga kampanya para mabantalaan sang maayong balita ang mga apa sa Cuba. Ang pinakauna nga nabase sa Biblia nga mga publikasyon gin-release sa Cuban Sign Language sang 2011. Subong, 756 ka kauturan ang nagaalagad sa 28 ka sign language nga kongregasyon kag 10 ka group sa bilog nga pungsod.

Amo ini ang una nga tion nga na-translate ang mga libro sang Biblia nga Mateo kag Marcos sa Cuban Sign Language. Ang isa ka sister nagsiling: “Ang pag-translate sang rekord sa Marcos 7:32-37 sang gin-ayo ni Jesus ang isa ka apa, nagpabatyag sa akon nga daw ako ang gin-ayo ni Jesus! Nakatandog gid ini sang akon balatyagon. Subong, mas maimadyin ko na ang mangin kabuhi ko sa bag-ong kalibutan. Salamat!”

Nalipay gid kita para sa tanan nga makabenepisyo sa sining regalo halin kay Jehova, kag sigurado gid kita nga mas madamo pa nga nagagamit sang Cuban Sign Language ang magahigugma kay Jehova ‘sa ila bug-os nga tagipusuon, kalag, kag hunahuna.’—Marcos 12:30.