Halin sang Mayo 10 asta 26, 2024, ginhiwat ang world championship sang International Ice Hockey Federation sa Czech Republic. Halos 800,000 ka tawo ang nagkadto sa sini nga event nga ginhiwat sa duha ka siudad sang Ostrava kag Prague, nga amo ang nag-host sang tournament. Nag-display ang mga Saksi ni Jehova sang mga cart sa gua sang arena sa tion sang event. Ari ang pila ka makapalig-on nga mga eksperiensia.

May duha ka pamatan-on nga lalaki nga nagpalapit sa cart kag namangkot sa mga kauturan kon sin-o sila kag kon ano ang ginahimo nila didto. Ginsilingan sila sang mga kauturan kon ano ang ginahimo sang mga Saksi ni Jehova kag ginsugiran sila parte sa interactive nga pagtuon sa Biblia. Ang isa sa ila namangkot kon san-o kag kon diin ginahimo ining pagtuon sa Biblia. Ginpaathag sang mga utod nga puede sia makatuon sa oras kag lugar nga gusto niya. Nagpasugot ang lalaki nga magpa-Bible study.

Sa lain naman nga adlaw, may tatlo ka lalaki nga nag-istorya sa aton mga utod kag nakibot sila sang nabal-an nila nga ang mga Saksi ni Jehova wala ginasuelduhan sa ila nga pag-preaching. Ang isa sa mga lalaki namangkot: “Kon wala kamo sang sueldo, ano ang makuha n’yo sa sini?” Ginsugid sang mga Saksi nga mas nagnami ang ila kabuhi sang ginsunod nila ang mga panudlo sang Biblia kag nahatagan sila sini sang paglaum sa palaabuton. Nagdayaw gid ang isa ka lalaki, gani nagsiling sia nga gusto niya makatuon sing dugang kag nangayo sia sang Magkabuhi sing Wala Katapusan! nga brosyur.

May isa naman ka lalaki nga pila ka beses naglabay sa cart. Sang ulihi, namangkot sia sa mga Saksi: “Ano ang kinalain sang inyo ginatudlo sa mga ginatudlo sang amon simbahan?” Gingamit sang aton mga utod ang Biblia para ipakita ang ginapatihan sang mga Saksi ni Jehova. Namati sing maayo ang lalaki kag nagpasalamat sia sa maathag nila nga pag-eksplekar. Dayon ginpakita sang mga Saksi sa iya ang pila ka feature sang jw.org kag kon paano gamiton ang website para makatuon pa gid sia sa Biblia kag mahibaluan ang ginatudlo sini.

Ginapasalamatan naton ang aton mga kauturan sa Czech Republic sa ila matutom nga pagbantala sang “maayong balita tuhoy sa maayo nga mga butang” sa tanan nga gusto mamati.—Roma 10:15.