Indi lang ang coronavirus nga pandemic ang ginabatas sang aton mga kauturan sa pila ka mga lugar sa Democratic Republic of the Congo kag Republic of the Congo, kundi pati man ang mga epekto sang baha kag ang sigesige nga mga kinagamo. Ang branch office sa Congo (Kinshasa), nga nagadumala sang pagbantala nga hilikuton sa sining duha ka pungsod, naghimo na sing mga paagi para mahatagan ang mga kauturan sang ila mga kinahanglanon kag mapalig-on sila. Ang branch nag-organisar na sing 57 ka Disaster Relief Committee (DRC) para maatipan ang mga kinahanglanon sang mga kauturan. Subong, sobra 90,000 na ka kauturan ang nahatagan sang suplay sang pagkaon.

Sang Abril 16 kag 17, 2020, nagbaha sa nasidlangan nga mga probinsia sang Democratic Republic of the Congo bangod sang mabunok nga mga pag-ulan. Bilang resulta, 139 ka manugbantala ang kinahanglan magbiya sa ila mga balay. Nagadayon sila subong sa mga balay sang mga kauturan, samtang nagapangita pa ang mga DRC sa sini nga lugar sing temporaryo ukon permanente nga ilistaran para sa mga kauturan nga nagbakwit.

Ang mga kauturan nagbulig man sa mga DRC paagi sa ila kaalwan. Sa isa ka lugar, ang mga kauturan nakatipon sing 700 ka kilo nga saging, 400 ka kilo nga mais, kag 220 ka kilo nga balinghoy kag mga ugbos sang balinghoy.

Dugang pa, temporaryo nga ginpaistar sang 60 ka manugbantala sa Some 26 Km Congregation sa ila balay ang 50 ka kauturan nga nagpalagyo halin sa ila mga lugar bangod sang mga kinagamo. Gintungatunga sang mga kauturan ang ila pagkaon para makakaon sila tanan asta nga nakabaton sila sang pagkaon halin sa DRC.

Ang isa ka ulo sang pamilya sa Brazzaville, ang kapital sang Republic of the Congo, nagsugid sang iya eksperiensia sang nakabaton sila sang bulig: “Ang kabuhi puede magbag-o sa isa lang ka pisok. May trabaho ako kag iguigo lang ang akon sueldo, kag ang akon asawa may sarisari nga mga sideline. Gani mabakal namon ang amon mga kinahanglanon. Sang nagsugod ang pandemic, nadulaan kami nga duha sang obra. Pero wala nadula ang amon pagsalig kay Jehova. Samtang nagaistoryahanay kami kon ano ang amon himuon kon maubos na ang amon pagkaon, may nabaton kami nga bulig halin kay Jehova.”

Si Sister Mbuyi Ester, nga isa ka balo halin sa siudad sang Kinshasa, nagsiling: “Napatay ang akon bana sang nagligad lang nga bulan, kag kinahanglan ko gid ang bulig. Wala ako sang trabaho kag may tatlo pa ako ka bata nga salaguron. Kon kami lang sang akon pamilya, indi gid kami makakita sing amo sini kadamo nga pagkaon nga bastante na para sa pila ka adlaw. Salamat gid, Jehova!”

Ginapangamuyo naton nga padayon nga atipanon ni Jehova ang aton mga kauturan kag pakamaayuhon ang ginahimo nga mga pagbulig. Ginahulat na gid naton ang tion nga ang tanan magakalipay sa kabuganaan sang duta.—Salmo 72:16.