Mabudlay ang kahimtangan sa bilog nga Democratic Republic of the Congo, sa central Africa, bangod sang mga bagyo kag malawig nga mga pagbaha. Ang branch office sang mga Saksi ni Jehova sa Congo (Kinshasa) nagreport nga madamo nga Saksi ang naapektuhan sini. Makapasubo nga isa ka brother ang napatay sa baha sa siudad sang Kinshasa, ang kapital sang pungsod.

Amo ini ang report sang branch sa Congo (Kinshasa):

• Sa bagatnan-nakatundan nga probinsia sang Kasai, naguba ang balay sang anom ka Saksi nga pamilya bangod sang mabaskog nga hangin kag ulan.

• Isa ka Kingdom Hall ang ginlapawan sang baha sa aminhan-nakatundan nga probinsia sang Sud-Ubangi. Tatlo ka kongregasyon ang nagagamit sini, nga may 69 tanan ka manugbantala. Naapektuhan man ang 22 ka pamilya sa sini nga lugar. Ang branch nag-asayn sang isa ka espesyal payunir kag isa pa ka gulang para mag-organisar sang materyal kag espirituwal nga bulig sa mga ginbahaan sa sining malayo nga lugar.

• Sa probinsia sang Tshopo, ang mga kauturan nga nagaistar sa pangpang sang Congo River napilitan nga magbakwit. Indi magnubo sa isa ka Kingdom Hall ang ginbahaan.

• Ginreport sang mga kongregasyon sa Kinshasa nga indi magnubo sa 80 ka pamilya ang ginbahaan.

Bangod sang pagbaha, naghigko ang lugar gani nagdaku ang posibilidad nga magmasakit ang mga nagaistar diri. Gani gin-instruksionan sang branch ang mga kauturan kon ano ang ila himuon para malikawan ang balatian.

Bisan pa sa sining mabudlay nga mga kahimtangan, nagabuligay ang mga kauturan, pareho sang paghatag sang mga pagkaon kag bayo. Nagabulig man ang Disaster Relief Committee nga ginadumalahan sang branch.

Kabalo kita nga ang aton mga pangamuyo, kag ang materyal kag espirituwal nga bulig nga ginhatag sang organisasyon ni Jehova, ‘magalugpay sa tanan nga nagalalaw’ sa sining mabudlay nga mga tion.—Isaias 61:1, 2.