Nagapadayon ang konstruksion subong sang bag-o nga pasilidad sa Lubumbashi, the Democratic Republic of the Congo, nga amo na ang mangin branch office. Halos 260 ka Bethelite ang magasaylo sa sini nga pasilidad sa Mayo 2022, samtang 131 ka Bethelite ang mapabilin sa branch office subong sa Kinshasa. a Nag-umpisa na man ang konstruksion sang dugang nga mga ilistaran kag mga opisina malapit sa branch subong sa Kinshasa. Mga 48 ka Bethelite ang nakaiskedyul nga maistar sa sining bag-o nga pasilidad sa Enero 2024. Ining duha ka bag-o nga mga propiedad magasuportar sang nagadamo nga manugbantala kag nagauswag nga pagbantala sa Congo.

Sa tion sang 2021 nga tuig sang pag-alagad, ang mga kauturan sa Democratic Republic of the Congo nagdumala sang sobra sa 250,000 ka pagtuon sa Biblia. Sobra isa ka milyon ang nagtambong sa Memoryal sang kamatayon sang Cristo. Subong, may 394 ka Bethelite sa branch office sa Kinshasa.

Bangod indi praktikal nga magdugang sang pasilidad sa Kinshasa, nangita sang lote sa iban nga siudad ang mga kauturan. Nakakita sila sang lote sa Lubumbashi nga puede mapatindugan sang bag-o nga pasilidad sang branch. Puede pa makapatindog didto sang dugang nga pasilidad sa palaabuton.

Ang propiedad sa Lubumbashi may kalayuon nga 2,300 ka kilometro sa Kinshasa. May kalaparon ini nga 12 ka ektarya kag may mga ilistaran, mga opisina, isa ka warehouse, isa ka multipurpose center nga may kalan-an, kag mga lugar para sa recreation.

Nagsugod ang konstruksion sang Nobiembre 2020, pero madamo sing naatubang nga kabudlayan bangod sa COVID-19 nga pandemic.

Si Brother Robert Elongo, isa ka miembro sang Branch Committee sa Congo (Kinshasa), nagsiling: “Sirado ang mga border. Apektado gid ang pagdeliber sang mga materyales nga ginagamit sa konstruksion, amo nga nadugayan ang pagtapos sang una nga bahin sang proyekto.”

Bisan pa sini, si Brother Elongo nagsiling, “Sa sulod lang sang isa ka tuig, natapos ang 40 porsiento sang obra sa una nga bahin sang proyekto.”

Makita gid ang pagpakamaayo ni Jehova sa sini nga proyekto sa konstruksion. Ginapangamuyo naton nga ining bag-o nga mga pasilidad makahatag sang maayo nga panaksi sa komunidad kag magdala sang himaya sa ngalan ni Jehova.—Mateo 24:47.