Samtang wala pa matapos ang COVID-19 nga pandemic, padayon nga gina-adjust sang aton mga kauturan sa bilog nga kalibutan ang ila paagi sang pagministeryo. Sa Ecuador, ang aton mga kauturan nangin madinalag-on sa pagbantala sang maayong balita sa sarisari nga paagi.

Sa siudad sang Ambato, ginpangteksan sang isa ka siete anyos nga manugbantala, sa bulig sang iya nanay, ang iya mga manunudlo. Ang pila sa iya mga text nagsiling: “Good Morning, Ma’am. Nag-text ako para sugiran ka sang makapaumpaw nga mensahe kay mabudlay ang aton panahon subong. Pero may mas maayo kita nga palaabuton siling sang Biblia sa Bugna 21:4. Ari ang link para sa dugang nga impormasyon.”

Ang isa niya ka maestra nag-reply: “Salamat gid, langga. Bisan bata ka pa, kaalam na sa imo.” Ginpasalamatan man sia sang isa pa gid ka maestra kag namangkot ini kon may digital version sang Ang Akon Libro sang mga Sugilanon sa Biblia. Ang maestra nagsiling nga may kopya sia sadto sini nga libro pero ginpahulam niya sa isa niya ka estudyante. Ginsugiran sia sining bata nga manugbantala nga puede niya ma-download ang libro sa jw.org.

Isa ka mag-asawa sa siudad sang Quevedo ang nangita sa ila cellphone sang ila mga kilala nga indi Saksi para teksan sini nga mensahe: “Isa ako sa mga Saksi ni Jehova. Bangod apektado ang aton pungsod kag ang bilog nga kalibutan sini nga krisis, indi kami makapamalaybalay. Pero gusto ka gid tani namon maistorya paagi sa videoconference.”

Ang kalabanan sa ila nga ginteksan nagpasugot. May naistorya sila nga isa ka babayi nga wala sadto nagapamati kon magbantala ang mga Saksi, pero ginpasalamatan niya ang mag-asawa sa ila pagpanikasog nga paumpawan ang mga tawo. Ang babayi nagsiling nga na-stress gid sia sa nagakatabo. Gani ginpadal-an sia sang mag-asawa sang Magmata!, Num. 1 2020, nga may tig-ulo nga “Pagpangita sing Paumpaw sa Stress,” sa PDF nga pormat. Sang nakaistoryahanay sila liwat, nagpasalamat sia sa magasin nga ginpadala sang mag-asawa kag nagsiling nga kapila na niya ini basahon.

Ang isa ka apa nga sister nga si Johana, nga nagaistar sa probinsia sang Santo Domingo de los Tsáchilas, “nagsulat” paagi sa mga drowing. * Dayon ginpiktyuran niya ang iya mga drowing kag ginpadala ini sa tanan niya nga kilala nga apa nga may numero sa iya cellphone. Pero may napadal-an sia nga babayi nga indi gali apa. Ang babayi nag-reply dayon kag nagpinamangkot. Kay indi maintiendihan ni Johana ang mga pamangkot, ginbuligan sia sang indi apa nga payunir nga sister nga si Rhonda.

Ginsilingan sang babayi si Rhonda nga natingala gid sia sa mga drowing nga ginpadala ni Johana. Namangkot sia kon bala may iban pa nga mga teksto sa Biblia parte sa mga nagakatabo subong. Gani ginbasa sa iya ni Rhonda ang Lucas 21:10, 11 kag ginpadala sa iya ang mga link sa mga video nga Ngaa Ginapasugtan sang Dios ang Pag-antos? kag Ngaa Gintuga sang Dios ang Duta? Nagpasugot ang babayi nga mag-istoryahanay sila liwat.

Pareho kay apostol Pablo nga nagpadayon sa “pagpanaksi sing maid-id tuhoy sa Ginharian sang Dios” bisan ara sia sa prisuhan, padayon man nga ginapanginpuslan sang aton mga kauturan ang tanan nga kahigayunan nga makabantala bisan ara lang sila sa ila mga balay.—Binuhatan 28:23.