Sang Marso 2022, ­ika-50 nga anibersaryo sugod nga nangin legal ang mga Saksi ni Jehova sa El Salvador. Pagkatapos nga ginrehistro sang gobierno ang aton mga kauturan sang Marso 27, 1972, nagdamo dayon ang mga kauturan sa El Salvador halin sa 2,524 sang 1972 asta sa 5,632 sang 1976. Subong, may sobra na 38,000 ka kauturan sa 662 ka kongregasyon.

Ang mga misyonero nag-abot sa pungsod sang 1945 kag nangabudlay gid sa pagbantala. Sadto nga tion, mahapos lang nga mangin legal sila nga pumuluyo. Gani, amat-amat nga naporma ang mga kongregasyon, kag gintukod ang branch office sa sini nga pungsod sang Mayo 1946.

Sang 1968, ang bag-o nga immigration law nagpatuman nga asta 5 lang ka tuig ang pagtener sang mga misyonero sa pungsod. Nahibaluan sang mga kauturan nga maapektuhan ang pagbantala kon wala ang mga misyonero. Gani namat-od ang mga nagapanguna sa mga kauturan nga magparehistro para mangin legal ang hilikuton.

Sang 1971, mga 30 ka gulang sa El Salvador ang ginpakadto sa branch office para istoryahan ini nga isyu. Sang tion sang miting, ginsilingan ni Brother Baltasar Perla, Sr., nga sang ulihi nangin miembro sang Branch Committee, ang tanan nga elder nga ihatag sa iya ang ila mga identity card nga halin sa gobierno. Dayon ginpabalo niya ang mga elder nga ang ila mga ngalan kag adres ibutang sa ila sulat sa gobierno nga nagapangabay nga irehistro sila.

Si Brother Juan Antonio Flores, isa sa mga elder nga ara sa sina nga miting, nagsiling: “Ginpaathag dayon sa amon ni Brother Perla, Sr. nga bangod ara ang amon ngalan kag adres sa sina nga dokumento, kon dumilian sang awtoridad ang aton hilikuton, kami ang una nga dakpon kag prisuhon.” Ginsilingan kami ni Brother Perla, Sr. nga ibalik niya ang identity card sang bisan sin-o sa amon nga nahadlok. Wala sing bisan isa sa amon nga nagbawi sang iya card. Kag maayo lang kay wala gid ginpamatukan sang gobierno ang hilikuton, kag wala man sing may napriso.

Nagmadinalag-on ang plano, kag nangin legal ang Association of Jehovah’s Witnesses pagkadason nga tuig. Halin sadto, puede na makaistar ang mga misyonero sa pungsod. Dugang pa, mas mahapos na sa branch nga makaorder sang mga literatura sa iban nga pungsod kag mas mahapos naman sa mga kauturan nga ipaathag sa mga opisyal sang eskwelahan kag sang gobierno kon ngaa neutral sila.

Sang Abril 26, 1972, ginreport sang opisyal nga newspaper sang gobierno sang El Salvador ang panguna nga tulumuron sang narehistro nga organisasyon: “[Para] magbantala sang mga panudlo sang Biblia kag sang maayong balita sang Ginharian sang Dios bilang panaksi sa ngalan, mensahe, kag pagkasoberano sang labing gamhanan nga Dios nga si Jehova.”

Madamo na nga tuig ang nagligad sugod sang ginreport ini, pero ang mga Saksi ni Jehova padayon gihapon nga nagabantala parte kay Jehova.—Isaias 25:9.