Sang Septiembre 27, 2024, gin-raid sang mga pulis sa Eritrea ang balay sang isa ka utod sa diin malinong nga nagatipon ang mga Saksi ni Jehova. May 24 nga gin-aresto: 6 ka brother, 16 ka sister, kag 2 ka menor-de-edad nga bata. Pagligad sang tatlo ka adlaw, nagbalik ang mga pulis kag gin-aresto ang 85 anyos nga sister nga nagaistar sa sina nga balay. Sang ulihi, ginpagua ang 2 ka menor-de-edad nga bata, pero ginsaylo ang 23 ka adulto sa Mai Serwa Prison.

Subong, 63 na ka Saksi ni Jehova ang napriso sa Eritrea bangod sang ila pagtuo, lakip ang 10 ka utod nga sobra na 70 ang edad. Ang tanan nga utod nga napriso, lakip ang mga gin-aresto sa sini nga pagpang-raid, wala gid sang rekord nga nakahimo sang krimen ukon napasakaan sang kaso.

Madugay na nga ginahingabot ang mga Saksi ni Jehova sa Eritrea. Mga 30 ka tuig ang nagligad, sang Oktubre 25, 1994, nagdesisyon ang presidente sang Eritrea nga indi na pagkilalahon nga pumuluyo sang pungsod ang tanan nga Saksi ni Jehova nga natawo sa Eritrea. Sugod sadto, ang mga kauturan nakaeksperiensia sang grabe nga paghingabot kag ginapriso sila bisan wala sing rason.

Nasubuan gid kita kay ginahingabot ang aton mga kauturan. Pero padayon gid naton nga ‘ginadumdom ang mga yara sa bilangguan’ sa Eritrea, kag nagasalig kita nga padayon sila ni Jehova nga hatagan sang paumpaw kag kusog para makabatas.—Hebreo 13:3.