Ang United States Commission on International Religious Freedom (USCIRF) nagsiling nga nabalaka sila kay Brother Tesfazion Gebremichael, nga masobra na 11 ka tuig nga napriso sa Eritrea. Ang website sang USCIRF nagsiling nga “bangod tigulang na si Gebremichael—nga mga otsentahon na subong—mahimo nga mabutang sa katalagman ang iya panglawas bangod ara sia sa prisuhan.” Sang Oktubre 7, 2022, si Commissioner Frederick Davie sang USCIRF nagpanawagan nga paguaon si Brother Gebremichael.

Gin-aresto sang mga awtoridad si Brother Gebremichael sang Hulyo 20, 2011, samtang nagaistorya sia sa iban sang iya mga ginapatihan. Bisan pa natawo sia sa Eritrea, indi na sia isa ka citizen sini nga pungsod bangod ginkuha sang gobierno ang citizenship sang tanan nga Saksi ni Jehova sang 1994.

Si Brother Gebrimichael nangin Saksi ni Jehova sang Enero 1971. Kilala sia nga mapinalanggaon, mabuot, kag wala sing gamo nga tawo nga mabinuligon sa iban. Sang 1974, napangasawa niya si Lemlem. Saksi ni Jehova man ang iya nga asawa. May apat sila ka bata kag lima ka apo.

Si Sister Gebrimichael nagsiling: “Nabalaka gid ako sa panglawas sang akon bana kay ara sia sa prisuhan, kag nahidlaw gid ako sa iya pagpalangga kag pagsuporta sa akon, pero bal-an ko nga indi sia pagpabay-an ni Jehova. Bilib gid ako sa katutom sang akon bana kag sa iya determinasyon nga indi gid magbiya kay Jehova. Ang pagpamalandong sa Manugwali 10:4 nagpalig-on sa akon nga mangin kalmado bisan pa may amo sini nga ginaatubang ang amon pamilya.”

Halin pa sang 1991, ginahingabot na sang Eritrea ang mga Saksi ni Jehova. Bisan pa 32 na ka Saksi ang ginpagua sa prisuhan halin sang Disiembre 2020 asta sa Pebrero 2021, may 20 pa ka kauturan nga wala pa makagua. Tanan sila wala kabalo kon san-o sila paguaon. Bangod indi nila madepensahan ang ila kaugalingon sa korte ukon sa iban pa nga paagi, ginapaabot nga mapriso sila asta nga buhi sila.

Sulitsulit nga ginkondenar sang dalagku nga mga organisasyon para sa human rights ang paglapas sang Eritrea sa kinamatarong sini nga mga kauturan kag ginmanduan ang pungsod nga kay-uhon ini nga sitwasyon. Sang 2016, ang UN Comission of Inquiry on Human Rights sa Eritrea nagsiling nga ang mga awtoridad sa Eritrea nakahimo sang “krimen batok sa katawhan” bangod sa ila paghingabot sa mga Saksi ni Jehova kag sa iban pa.

Ang padayon nga pagpriso kay Brother Gebremichael nagapakita sa kapintas sang gobierno sa mga Saksi, bisan sa mga tigulang. Halin sang 2011, apat na ka Saksi ang napatay sa prisuhan kag tatlo ka tigulang na nga mga Saksi ang napatay pagkatapos sila mapagua bangod sa mabudlay katama nga sitwasyon nga ila gin-antos sa prisuhan.

Madamo nga beses nga nagpangabay ang mga Saksi ni Jehova nga makig-istorya sa mga opisyal sang Eritrea parte sa sini pero wala gid sila ginsapak.

Ginapangamuyo naton ang aton mga kauturan nga ara gihapon sa prisuhan bisan pa wala sila sing sala. Nagasalig gid kita nga indi sila pagpabay-an ni Jehova.—Hebreo 13:3.