Naeksperiensiahan sang mga Saksi ni Jehova sa Eritrea ang pinakagrabe nga paghingabot. Sugod sang nangin independiente nga pungsod ang Eritrea sang 1993, padayon nga ginapriso, gina-torture, kag gina-harass sang gobierno ang mga Saksi ni Jehova. Ang isa ka mando sang presidente sang Oktubre 25, 1994, nagdeklarar nga “ginkanselar [sang mga Saksi] ang ila citizenship” bangod wala sila nagaentra sa pulitika kag nagapangindi man sila nga magsoldado. Bangod sini, ginkuha sang gobierno ang panguna nga mga kinamatarong sang mga Saksi.

Bangod sa malawig nga tinuig sang paghingabot kag pagpaantos, madamo nga Saksi ang napilitan nga malagyo sa iban nga pungsod. Ang mga nabilin, pirme ara sa katalagman nga maltratuhon kag dapat sila maghalong gid kon nagahimo sang bisan ano nga hilikuton sang ila relihion. Sa pagligad sang mga tinuig, madamo na nga mga Saksi ang gin-aresto kag ginpriso sang mga awtoridad sa Eritrea. Ang pila ka rason amo ang pagpangindi nga magsoldado bangod sa konsiensia, pagtambong sa relihioso nga mga miting, pag-istorya sa iban parte sa Biblia, ukon sa wala nahibaluan nga rason. Nalakip sa mga ginpriso ang mga may edad na nga mga lalaki, mga babayi, kag kon kaisa pati mga bata. Tatlo ka lalaki nga Saksi ang sobra na 20 ka tuig sa prisuhan. Wala sang bisan isa sa ila ang pormal nga ginkasuhan ukon gin-hearing kag nasentensiahan.

Natalupangdan gid sang bilog nga kalibutan ang paghingabot sa mga Saksi ni Jehova sa Eritrea. Ginbuksan sang mga opisyal sang gobierno sang Africa, Europe, kag United States ini nga isyu kontra sa mga opisyal sang Eritrea, pero wala gihapon nagahulag ang gobierno. Madamo nga beses na nga nangabay ang mga Saksi ni Jehova nga makig-istorya sa mga opisyal sang gobierno sa Asmara para masolbar ang mga problema, pero wala sila ginasapak sang gobierno.