Sang Hulyo 25, 2019, isa ka bag-o nga Bible museum ang ginbuksan sa sanga talatapan sang mga Saksi ni Jehova sa France, nga ara sa banwa sang Louviers, nga mga 100 kilometros halin sa Paris. Ini nga museum may tema nga “The Divine Name and the Bible in French.”

Makita sa sini nga museum ang madamo kag talagsahon nga mga Biblia sa French nga lenguahe. Ang isa sini amo ang orihinal nga kopya sang 1535 Olivétan French Bible, nga ginatawag man nga “La Bible de Serrières.” Ang Olivétan amo ang una nga kompleto nga translation sa French nga ginhimo sang mga Protestante. Amo man ini ang una nga French nga Biblia nga gin-translate halin sa orihinal nga mga lenguahe. Daku gid ang nangin epekto sini sa masunod nga mga translation sang Biblia, lakip ang 1537 Matthew’s Bible sa English, ang Geneva Bible sa English, kag ang Geneva Bible sa French. Ang iban pa nga talagsahon nga orihinal nga mga Biblia nga nakadispley diri amo ang 1541 nga ikatlo nga edisyon sang Biblia nga gin-translate ni Jacques Lefèvre d’Étaples sa French, ang 1541 Latin Pentateuch kag ang 1545 Latin Bible nga ginhimo sang taga-Paris nga manugbalhag nga si Robert Estienne, kag ang Biblia nga French nga ginhimo sang 1557 sang taga-Lyon nga manugbalhag nga si Jean de Tournes.

Ang Olivétan, ang Latin Pentateuch kag Latin Bible nga ginbalhag ni Estienne, kag ang Jean de Tournes Bible naggamit sang ngalan sang Dios, nga Jehova. Ini nga mga Biblia una nga gindonar sa Museum Department sa World Headquarters sang mga Saksi ni Jehova sa Warwick, New York. Gindugang ini sa koleksion sang mga Biblia sa sanga talatapan sa France.

Si Enrique Ford, nga miembro sang Museum Department, nagsiling: “Ginasugid sining bag-o nga Bible museum sa amon sanga sa France ang makawiwili nga kasaysayan sang Biblia sa French nga lenguahe. Ginapadaku man sini nga mabasa sa Biblia ang ngalan sang Dios nga si Jehova. Padayon kami nga magapangita sang talagsahon nga mga Biblia nga puede idispley sa amon mga museum sa bilog nga kalibutan.”