Kada apat ka tuig, ginahiwat sa Rouen, France, ang Armada, nga isa ka pinasahi nga pagtilipon sang dalagku nga de-layag nga mga barko halin sa bilog nga kalibutan. Sini nga tuig, ginselebrar ini halin sang Hunyo 8 asta 18, kag may ara mga anom ka milyon ka bisita halin sa sarisari nga pungsod. Kada adlaw, naga-display ang mga Saksi ni Jehova sang mga literature cart sa 12 ka lokasyon sa bilog nga siudad. Sobra 600 ka kauturan ang nagpartisipar sa sini nga hilikuton kag nakapakig-istorya sa ginatos ka tawo.

Ang isa ka retired nga photographer nagpalapit sa isa sa aton mga literature cart kag nagsiling nga mabuot kag mainabyanon gid ang mga Saksi bisan diin man niya sila makita. Bangod sa iya ginsiling, nakaistoryahanay sila sing malawig parte sa mga tawo nga wala nagapakita sang gugma subong. Pagkatapos mabasa kag maistoryahan ang 2 Timoteo 3:1-5, nagbaton sia sang Magkabuhi sing Wala Katapusan! nga brosyur. Dayon nagbilin sia sang iya contact information kag nagsiling nga gusto niya maistorya liwat ang mga Saksi.

May isa man ka bataon nga babayi nga nagpalapit sa literature cart kag namangkot: “Kon napatay si Jesus kag nabanhaw, ngaa wala pa ’ya nabanhaw ang aton mga pinalangga? Napatay na ang akon lolo kag lola kag gusto ko sila makita liwat.” Para masabat ang iya pamangkot, ginpatan-aw sang aton sister sa babayi ang video nga Paumpaw Para sa mga Napatyan. Pagkatapos sang ila pag-istoryahanay, nagbaton sia sang brosyur kag nagpasugot nga magpa-Bible study.

Nalipay kita para sa aton kauturan sa France nga naggamit sang ila tion kag kusog para ‘mabantala ang maayong balita sa iban.’—1 Corinto 9:23.