Sang Enero 2023, 50 ka tuig na sugod sang gingamit ang mga pasilidad sang branch sa rehiyon sang Normandy sa France. Pagligad sang anom ka bulan sadto, sang Hunyo 9, 1973, ginhiwat ang dedikasyon para sa sini nga pasilidad.

Antes gintukod ang mga bilding sa Normandy, ang tanan nga hilikuton sang France Bethel ginaorganisar sa siudad sang Boulogne-Billancourt, malapit sa Paris. Pero sang ulihi, kulang na gid ini nga mga pasilidad para atipanon ang pagdamo sang mga manugbantala sang Ginharian sa pungsod. Dugang pa, ang mga literatura ginaimprinta kag ginapadala sa France halin sa United States paagi sa pantalan sa siudad sang Le Havre, nga mga 200 ka kilometro halin sa branch. Gani, para mapalip-ot ang oras sa pagbiyahe kag makakinot, nagpangita ang mga kauturan sang propiedad sa tunga sining duha ka siudad para tukuran sang dugang nga pasilidad sang Bethel.

Sang ulihi, nakakita kag nakabakal ang mga kauturan sang manami nga propiedad sa gamay nga banwa sang Louviers, nga mga 100 ka kilometro ang kalayuon halin sa Paris kag Le Havre. Ang konstruksion sini nga pasilidad nagsugod sang 1972 kag naglawig sing walo ka bulan.

Padayon nga nagdamo ang mga manugbantala sang Ginharian sa masunod nga mga tinuig. Bangod sang pag-uswag, kinahanglan magpatindog sang dugang nga mga bilding sa pasilidad sa Normandy. Sang 1996, nabakal nila ang isa ka lote malapit sa sini nga pasilidad. Gintukuran ini sang dugang nga mga residence building kag ang mga miembro sang Bethel family nga nabilin sa Boulogne-Billancourt ginsaylo sa Normandy.

Subong, sobra 162,000 ka manugbantala sang Ginharian ang nagabantala sang maayong balita sa 13 ka pungsod nga ginadumalahan sang branch sa France. Sang 1999, gin-untat ang pag-imprinta sang mga publikasyon sa branch sa France, pero gin-renovate sang mga kauturan ang pasilidad sa Normandy kag padayon ini nga ginagamit para suportahan ang pagbantala kag pagpanudlo nga hilikuton. Nalakip sa sini ang pag-translate sang base sa Biblia nga mga publikasyon sa 24 ka lenguahe. Ginadumalahan man sang branch ang paghimo sang sarisari nga mga video. Subong, sobra 400 ka kauturan ang nagaobra sa branch.

Nalipay kita nga ginapadasig ni Jehova ang pagbantala nga hilikuton sa France!—Isaias 60:22.