Sang Hunyo 30, 2023, gin-release ni Brother Joni Shalamberidze, miembro sang Branch Committee sa Georgia, ang The Bible—The Good News According to Matthew sa Mingrelian nga lenguahe. Amo ini ang una nga libro sang Biblia nga gin-publish sa sini nga lenguahe. Gin-release ini nga libro sang Biblia sa 627 nga nag-attend sa 2023 “Mangin Mapinasensiahon”! nga Rehiyonal nga Kombension nga ginhiwat sa Assembly Hall sa Zugdidi, Georgia. Available ini sa naimprinta kag digital nga pormat.

Ang Mingrelian ginahambal sang kalabanan nga tawo nga nagaistar sa Samegrelo region sa nakatundan sang Georgia. Sang 2019, ginbuksan sang mga Saksi ni Jehova ang isa ka remote translation office sa Zugdidi.

Ang mga Saksi ni Jehova ang isa sa pila lang ka organisasyon nga nag-publish sang nasulat nga materyal sa Mingrelian nga lenguahe. “Ang Mingrelian ginahambal lang nga lenguahe, gani wala sang standard nga grammar kag spelling,” siling sang isa ka translator. “Amo ina ang kabudlayan namon sa pag-translate. Nagdesisyon kami nga sundon ang grammar sang Georgian nga lenguahe samtang ginapanilagan namon sing maayo kon paano ginahambal ang Mingrelian nga lenguahe.”

Dugang pa, ang pila ka tinaga sa Biblia wala sang katumbas sa Mingrelian. Halimbawa, wala sang tinaga para sa “paghinulsol.” Gani, ini nga ideya gin-translate nga “pagpangasubo bangod sa nahimo nga sala.”

Nagakalipay kita upod sa aton mga kauturan nga nagahambal sing Mingrelian samtang ginagamit nila ining bag-o nga translation para buligan ang mas madamo nga tawo nga “ginagutom kag ginauhaw sa pagkamatarong.”—Mateo 5:6.