Sugod sang 1953, aktibo na ang mga Saksi ni Jehova sa Georgia. Narehistro sila kag hilway nga makasimba nga wala sing balagbag. Pero may mga problema man, kay kon kaisa ginaestriktuhan ang mga relihion.

Halin sang 1999 asta sang 2003, ginpintasan sang mga extremist sa relihion ang mga Saksi ni Jehova. Nag-isog pa gid ini nga mga manughingabot kay wala sila ginasilutan sang mga awtoridad. Sina nga tion, isa ka nasyonalista nga miembro sang parliamento ang temporaryo nga nagmadinalag-on sa pagkanselar sang rehistro sang mga Saksi, kag bangod sini nagdugang pa gid ang pagpamintas. Nag-file sang anom ka aplikasyon ang mga Saksi sa European Court of Human Rights (ECHR) para masolbar ang problema. Nag-ugyunay ang mga judge sang ECHR sa duha ka desisyon nga ila ginpapanaug sang 2007 kag sang 2014. Ginkondenar sini nga mga desisyon ang gobierno bangod wala ini naghulag gilayon, kag wala sing ginhimo nga epektibo kag patas nga desisyon para sa mga biktima. Sang 2015, ginbaton sang ECHR ang pag-aku sang gobierno nga indi makatarunganon ang pagkanselar sini sa rehistro sang legal nga mga korporasyon sang mga Saksi sang 2001.

Sugod sang 2004, amat-amat nga naghaganhagan ang pagpamintas sa mga Saksi ni Jehova. Napasangkad nila ang ila mga hilikuton kag nakapatindog sang madamo nga Kingdom Hall. Pero, may mga bes gihapon nga ginaatake sila kag gina-harass. Nagalala ini bangod sa masami wala sang ginahimo ang gobierno kontra sa sini nga mga krimen. Nagalaum ang mga Saksi nga magahulag ang gobierno sang Georgia para sundon ang desisyon sang ECHR nga imbestigahan sini gilayon ang mga pagpamintas, kag silutan ang mga nagahimo sini.