Sang Disiembre 18, 2021, gin-release ni Brother Dirk Grundmann, miembro sang Branch Committee sang Central Europe, ang una nga mga bahin sang Bag-ong Kalibutan nga Badbad sang Balaan nga Kasulatan sa German Sign Language. Ginabulubanta nga mga 800 ang nagtan-aw sang pag-release sang mga libro sa Biblia nga Mateo kag Juan paagi sa video stream.

Sang 2002 lang ginkilala sang gobierno sang Germany nga isa ka lenguahe ang German Sign Language. Pero ang mga Saksi ni Jehova naga-interpret na sa sign-language sa mga asembleya kag kombension sa Germany sugod pa sang mga 1960. Subong, may 571 ka manugbantala nga nagaalagad sa 11 ka German Sign Language nga kongregasyon kag 21 ka grupo.

Amo ini ang una nga tion nga may kompleto nga mga libro sang Biblia nga gin-translate sa German Sign Language. Sadto, ang matigayon lang sang mga manugbantala amo ang pila ka bersikulo sa Biblia nga gin-translate para magamit nila sa personal nga pagtuon kag pagministeryo.

“Bangod wala sang kompleto nga Biblia, kundi pila lang ka bersikulo, masami nga mabudlay makakita sang mga prinsipio sa Biblia ukon para pamatud-an ang aton pagtuo,” siling sang isa ka manugbantala. “Kabudlay man palig-unon ang mga estudyante sa Biblia nga binagbinagon ang Biblia kada adlaw kay mabudlay intiendihon ang utod-utod nga mga bersikulo.”

Ang isa ka translator nagsiling: “Dalayawon gid nga hilikuton ang pag-translate sang Biblia kag pag-translate sang pulong ni Jehova. Paagi sa sini ang isa ka apa makapakig-abyan sa iya. Nalipay gid kami sa pribilehiyo nga makapakigbahin sa sini nga proyekto.”

Nagapangamuyo kita nga ang Bag-ong Kalibutan nga Badbad sa German Sign Language makabulig sa madamo nga mahagop nga mahibaluan ang dalanon ni Jehova.—Salmo 25:9.