Sang Septiembre 15, 2024, ginbuksan sang Sachsenhausen Memorial and Museum sa Oranienburg, Germany, ang isa ka temporaryo nga exhibit nga ginatawag “Jehovah’s Witnesses Stand Firm Against Nazi Assault.” Ini nga exhibit magapadayon asta sa tungatunga sang Disiembre 2024. Ang pagbukas sini nagtupa sa ika-85 nga anibersaryo sang pagpatay kay Brother August Dickmann. Sia ang una nga nakilala gid sa iya ngalan bangod nangindi sia sa pagsoldado. Ginpatay sia sang panahon sang Nazi bangod sa iya mga pagpati sa relihion.

Sobra 280 ka Saksi ni Jehova ang ginpatay sang mga Nazi bangod nangindi sila nga magsoldado. Ang exhibit may 33 ka display panel sa diin makita kag mabasa ang inagihan sang pila sa sining matutom nga mga Saksi. Ang isa sa sini amo ang eksperiensia ni Sister Emmy Zehden. Sang Hunyo 9, 1944, ginpatay sia sa prisuhan sang Plötzensee sa Berlin, Germany. Ginpatay sia kay gintago niya sanday Gerhard Liebold kag Werner Gaßner upod sa iya gin-adoptar nga bata nga lalaki nga si Horst. Ining tatlo ka brother nagpangindi sa pagsoldado.

Sa opening ceremony sang exhibit, gin-interbyu si Brother Hans-Joachim Rehwald kag may ginsugid sia parte sa iya tatay nga si Josef. Sang 1938, nangindi si Josef nga mag-entra sa mga soldado sang Germany. Bangod sini, gin-aresto sia kag ginsentensiahan nga mapriso sing isa ka tuig. Sang ulihi, napriso sia sa tatlo ka concentration camp, lakip sa Sachsenhausen. Nakita niya mismo ang pagpatay kay August Dickmann. Bisan pa sang mga kabudlayan, wala gid nagluya ang determinasyon ni Josef nga magpabilin nga matutom kay Jehova. Sa tapos ma-tour ang exhibit, ang isa ka brother nagsiling: “Nagdayaw gid ako sa mga kauturan sadto nga tion kay grabe gid ang ila determinasyon nga magpabilin nga neutral, bisan pa mapatay sila. Gusto ko man sundon ang ila katutom.”

Subong, madamo man nga Saksi ang ginahingabot bangod neutral sila. Gani, nagapasalamat gid kita sa katutom sang aton mga kauturan sang panahon sang Nazi, bangod ang ila eksperiensia nagapasalig sa aton nga buligan kag pabakuron man kita ni Jehova samtang nagaatubang kita sang mga kabudlayan.—1 Pedro 5:10.