Sang Disiembre 15, 2023, si Sister Simone Arnold-Liebster nakabaton sang Order of Merit of the Federal Republic of Germany. Ang Order of Merit amo ang pinakamataas nga award sa Germany nga ginahatag sa mga indibiduwal para sa ila ginhimo nga pagbulig sa madamo nga tawo. Ginhatag ini kay Simone sang Consul General nga si Thomas Pröpstl sa isa ka seremonya sa Chambéry, France. Si Simone 93 ka tuig na subong. Ginpasalamatan sia sa iya panikasog para ipadumdom sa mga tawo ang pagpamintas nga ginhimo sang gobierno sang Nazi kag ang pagpamintas man sini sa mga nangindi nga suportahan ini.

Asta subong, nakapakig-istorya si Simone sa madamo nga tawo sa 25 ka pungsod. Halos 65,000 ang naka-attend sa iya mga lecture, lakip ang madamo nga mga estudyante kag mga maestra kag maestro. Bisan pa tigulang na sia, padayon sia gihapon nga nagahatag sang mga lecture, kag ginasabat niya ang mga pamangkot sang mga pamatan-on kag ginasugiran sila sang mga leksion nga natun-an niya sang pamatan-on pa sia. Pagkatapos maka-attend sa isa ka lecture, ang isa ka estudyante nagsulat: “Sa tapos ko mabatian ang istorya ni Simone natun-an ko nga puede kita mangin mabakod kon kumbinsido kita sa aton mga ginapatihan.”

Sang ginhatag kay Simone ini nga award sang Consul General nga si Thomas Pröpstl, ang Consul General nagsiling: “Dalayawon gid kon paano ka napabakod paagi sa imo eksperiensia bisan nag-antos ka. Sa imo mga istorya ginsugid mo gid ang tanan kag sing mainayuhon, kag nagalaum ka nga may paghidait gid sa palaabuton. Bangod sini, may daku gid ako nga respeto sa imo.”

Sang nagagahom ang Nazi nga gobierno, si Simone kag ang iya pamilya, pareho sa linibo ka mga Saksi ni Jehova, nag-antos sang paghingabot. Sang 12 ka tuig si Simone, ginkuha sia sa ila balay kag ginpilit nga mag-istar sa Konstanz, Germany, sa Von Wessenberg Reformatory, nga isa ka penitentiary school diin ginpilit sia sang mga Nazi nga batunon kag suportahan ang ila gobierno. Wala niya ginsuportahan ang panudlo sang ila gobierno kag bangod sina ginpakahuy-an, ginpagutman, kag ginpilit nga mag-obra ang pamatan-on nga si Simone. Wala man sia ginpasugtan nga maghambal sa sulod sang halos duha ka tuig. Parte sa sina nga tion, si Simone nagsiling: “Ginsuportahan ako ni Jehova; nangin matutom ako sa iya.”

Napalig-on gid kita sa istorya sang katutom ni Simone kag sang iya padayon nga pagdayaw sa aton Amay, si Jehova nga Dios.—Mateo 5:16.