Suno sa nareport na sa jw.org kag sa The New York Times, wala gid ginbalik sang Bundeswehr Military History Museum sa Dresden, Germany ang archive ni Sister Annemarie Kusserow. Ginapakita sini nga wala gid ginrespeto ang iya gintugon sa iya last will and testament. Pero may bag-o nadiskobrehan nga ebidensia nga nagasuporta nga dapat ini ihatag sa mga Saksi ni Jehova. Bangod sini, ginsugdan sang aton organisasyon ang bag-o nga kaso kontra sa museum.

Sa sobra pito ka tuig, gintinguhaan sang mga Saksi ni Jehova nga makig-istorya sa Museum para magsugtanay kag indi na magkasuhay kon ibalik sang museum ang archive, pero wala gid ini natabo. Gani, nag-file sang kaso sa korte ang organisasyon. Pero ginbasura ini nga kaso sang 2021, kay suno sa korte legal nga ginbakal sang museum ang archive.

Sang 26 anyos si Annemarie, ginsugdan niya nga tipunon ang mga materyal parte sa mga Saksi ni Jehova sang panahon sang Holocaust. Ginhalungan gid niya ini, bisan pa kon kis-a kinahanglan niya irisgo ang iya kabuhi, sa sulod sang sobra 65 ka tuig asta nga napatay sia sang 2005. Ini nga archive nga gintipon niya para sa masunod nga mga henerasyon kag ilabi na para sa iya mga kauturan, ginakabig nga isa ka bahandi sa kasaysayan.

Ini nga archive, gintipon ni Annemarie bangod gusto niya nga madamo nga tawo—Saksi ni Jehova man ukon indi—ang padayon nga makatuon sa kasaysayan sang katutom sang ila pamilya. Para masigurado ini, gintugon niya nga ang mga Saksi ni Jehova lamang ang dapat manubli sini nga archive. Pero wala pa matuman ang iya gusto.

Si Annemarie, upod sa apat sa iya mga utod, gin-feature sa 1991 nga British documentary nga Purple Triangles. Paagi sa sini nga film, nga nagapokus sa eksperiensia sang pamilya Kusserow, makita kon paano ginhingabot sang mga Nazi ang mga Saksi ni Jehova bangod indi nila pagbiyaan ang ila pagtuo kag indi sila magsumpa nga magdampig kay Hitler. Si Annemarie makita sa documentary nga nagabukad sang mga dokumento kag mga piktyur nga iya gintipon.

Sa isa ka interbyu nga ginhimo antes sia mapatay, gin-istorya niya ang tion nga gindakop sia sang Gestapo sa iya apartment kag diutayan lang nga makompiskar ang importante nga mga dokumento sa iya archive. Sia nagsiling: “Ginbutang ko ini nga briefcase sa entrance hall. May mga sulat sa idalom sini kag ang tanan nga iban pa nga dokumento.” Ginpuno niya ining daku nga briefcase sang mga apple, para indi na pag-ukayon sang Gestapo ang idalom. Pensar niya nga kon madakpan sia, ‘May kaunon ako sa prisuhan.’ Maayo lang kay wala nila ini nakita.

Wala madugay sang napatay si Annemarie, nadula ang archive sa ila balay. Sang ulihi, nadiskobrehan nga ginbaligya ini sa museum sang isa niya ka utod nga lalaki nga indi na isa sa mga Saksi ni Jehova. Wala gid sia sing permiso halin kay Annemarie. Napatay na ining iya utod.

Ang mga miembro sang pamilya ni Annemarie nga buhi pa, kabalo gid sang iya tugon sa iya testamento, gani indi gid sila makapati sang nagdesisyon ang korte nga magapabilin sa museum ang archive. Sugod sina nga tion, ang mga pamilya, abyan, kag iban pa nga mga Saksi ni Jehova nga ginhingabot sang Nazi nagpadala sang ginatos ka sulat sa museum kag sa Ministry of Defense, nga amo ang nagadumala sa museum. Nagapangabay sila nga ibalik ang archive sa mga Saksi ni Jehova nga amo gid ang tugon ni Annemarie.

Ang isa sa espesyal nga mga dokumento sa archive amo ang farewell letter sang utod ni Annemarie, nga si Wilhelm. Ginsulat niya ini sang Abril 26, 1940. Bilang isa sa mga Saksi ni Jehova, nangindi sia nga magsoldado. Bangod sini, ginsentensiahan sia sang kamatayon sang mga Nazi.

Ang sulat ni Wilhelm nagasiling: “Pinalangga ko nga mga ginikanan, kag mga utod: “Kabalo gid kamo tanan kon daw ano ko kamo ka palangga, kag madumduman ko gid ini kada magtan-aw ako sa aton family picture. Kanami gid sang aton pag-updanay sa balay. Pero ang pinakaimportante, amo nga dapat naton higugmaon ang Dios, suno sa ginsugo sang aton Lider nga si Jesucristo. Kon mangin matutom kita sa Dios, padyaan niya kita.” Gintiro sia para mapatay sang aga sang Abril 27 sa edad nga 25.

May 11 ka kabataan ang mga ginikanan ni Annemarie nga sanday Franz kag Hilda Kusserow. Pareho kay Wilhelm, ginpriso man si Franz kag ang magulang nga mga bata nga lalaki bangod wala sila nag-entra sa inaway. Ang mas manghod nga mga kabataan nangindi sa paghimo sang pagsaludo para kay Hitler gani ginkuha sila sa ila mga ginikanan kag ginbutang sa mga reform school kag sang ulihi ginpaadoptar sa iban nga mga pamilya.

Ang mas manghod sa mga lalaki nga kabataan sang Kusserow nga si Wolfgang, gindala sa korte sang militar. Didto maisog sia nga nagsiling: “Ginpadaku ako bilang Saksi ni Jehova, suno sa pulong sang Dios nga nasulat sa Balaan nga Kasulatan. Ang pinakadaku kag pinakabalaan nga sugo niya sa mga tawo amo: ‘Higugmaon mo ang imo Dios labaw sa tanan kag ang imo isigkatawo subong sang imo kaugalingon.’ Ang isa pa ka sugo mabasa: ‘Indi ka magpatay.’ Ginpasulat bala ini sang aton Manunuga para sa mga kahoy?”

Sang Marso 28, 1942, ang 20 anyos nga si Wolfgang ginpugutan sang ulo paagi sa guillotine.

Grabe gid ang pag-antos ni Annemarie kag sang iya pamilya bangod sang ila pagtuo sa Dios kag pagpangindi nga suportahan ang mga Nazi, kag ang iban sa ila napatay bangod indi sila mag-entra sa inaway kag magpamatay. Kon totalon ang kalawigon sang pagkapriso sang mga miembro sang ila pamilya, naglawig ini sang 47 ka tuig.

Ini nga archive nagabulig sa aton nga maintiendihan ang dalayawon nga halimbawa sang pagtuo sini nga pamilya. Ang mga dokumento sa sini nga archive nagapakita kon paano ang pagtuo sa Dios makapabakod bisan sang grabe nga paghingabot kag pamahog nga patyon. Ina nga mensahe nga matun-an naton sa sini nga archive maintiendihan kag maapresyar gid sing maayo kon ara ini sa mga museum sang mga Saksi ni Jehova.

Sang Oktubre 2022, napatay si Paul Gerhard Kusserow nga amo na lang ang nabilin sa mga bata nga lalaki sang ila pamilya. Handum gid niya nga maabot ang tion nga respetuhon sang museum ang gusto sang iya magulang, nga ginkampanya gid niya asta sang napatay sia. Sia nagsiling: “Napatay ang akon mga utod nga lalaki bangod nangindi sila nga magsoldado. Para sa akon, indi gid insakto nga sa tanan nga lugar, sa military museum pa ginbutang ini nga archive.”

Ugyon gid sa sini ang mga Saksi ni Jehova. Isa gid ka daku nga inhustisya ang ginhimo sang museum nga pagbalewala sa maathag nga tugon ni Annemarie. Sang nagligad, wala ginrespeto sang National Socialism ang desisyon sang pamilya Kusserow, kag subong wala ini gihapon ginrespeto sang moderno nga Germany.

Makapasubo nga ang archive mismo, wala man ginrespeto. Ini nga archive, may sobra 1,000 ka dokumento pero 6 lang sa sini ang gindispley. Ang iban ara lang sa bodega sang museum gani indi makita sang mga tawo kag indi sila makatuon sa sini.

Ginapangamuyo naton nga magadesisyon ang korte nga ihatag ang archive sa mga Saksi ni Jehova, nga amo ang may legal kag moral nga kinamatarong sa sini.—Lucas 18:7.