Sang Septiembre 26, 2018 asta Enero 6, 2019, nag-host sang isa ka espesyal nga eksibit ang Munich Documentation Centre for the History of National Socialism. Katuyuan sini nga ipahibalo sa publiko ang mga inagihan sang mga Saksi ni Jehova sang panahon sang Nazi. Ini nga Centre ara mismo sa lugar nga ginatindugan sadto sang headquarters sang partido sang Nazi.

Sa pagbukas sang programa, ginpaathag ni Dr. Hans-Georg Küppers, ang cultural advisor sa Munich, kon ngaa ginhimo ini nga eksibit: “Importante gid ini nga eksibit, kay sa malawig nga panahon, wala mabal-an sang mga tawo nga ginhingabot sang rehimen sang Nazi ang mga Saksi ni Jehova. . . . Tulumuron sini nga eksibit nga ipahibalo sa publiko kon ano gid ang natabo sa sini nga mga biktima.”

Ang mga inagihan sang aton mga kauturan sa Munich sa idalom sang rehimen sang Nazi ginpakita sa 60 ka displey nga puno sang istorya sang kaisog, pagkamainunungon, kag kadalag-an. Ang isa sini nga mga displey nagasugid sang inagihan nanday Martin kag Gertrud Pötzinger, nga gin-aresto kag ginpriso sa magkatuhay nga concentration camp mga pila pa lang ka bulan sa tapos sila makasal. Wala sila magkitaay sa sulod sang siam ka tuig. Pareho sila nga nakaluwas, kag si Brother Pötzinger nag-alagad sang ulihi bilang miembro sang Nagadumala nga Hubon sang mga Saksi ni Jehova.

Sa isa ka displey naman makita ang istorya ni Therese Kühner, nga nangin Saksi ni Jehova (ginatawag sadto nga International Bible Students) sang 1929. Sang gindumilian sang Germany ang mga Saksi, sekreto sila nga nagahiwat sing miting sa iya balay kag patago man sia nga nagaimprinta sing mga literatura paagi sa manomano nga mimeograph machine. Sang madiskobrehan sang mga Nazi ang iya ginahimo, gin-aresto sia kag gin-akusahan sang “pag-imprinta kag pagpanagtag sang mga literatura nga batok sa gobierno kag nagapaluya sang buot sang mga soldado.” Nagpadayon nga matutom si Sister Kühner asta sa kamatayon. Ginpatay sia sang Oktubre 6, 1944.

Makita man sa iban pa nga displey ang pagpabilin nga neutral sang aton kauturan nga wala gid nagsaludo kay Hitler—ang rason kon ngaa ginadumtan gid sila sang rehimen sang Nazi.

Sang 1934, nangako si Hitler nga dulaon niya ang mga Saksi ni Jehova. Sia nagsiling: “Ini nga grupo madula sa Germany!” Ginbatas sang mga Saksi ang mapintas nga paghingabot samtang ginahimo ni Hitler ang iya malaut nga plano. Wala na subong si Hitler kag ang iya partido, pero ang aton kauturan sa Germany nagadamo na subong sing sobra sa 165,000. Nagapasalamat gid kita kay Jehova kay kon nagaantos kita, ginahatagan niya kita sing paglaum nga “wala nagaresulta sa kapaslawan.”—Roma 5:3-5.