Pagkatapos sang apat ka tuig nga pag-translate, ginpagua ang kompleto nga Bag-ong Kalibutan nga Badbad sang Balaan nga Kasulatan sa Nzema sang Nobiembre 22, 2019 sa rehiyonal nga kombension sa Bawia, Western Region, Ghana nga gintambungan sang 3,051. Si Brother Samuel M. Kwesie, nga miembro sang Komite sang Sanga sa Ghana, ang nagpagua sini.

Pito ka translator ang nagpangabudlay sa sini nga proyekto. Ang isa ka translator nagsiling: “Ang Bag-ong Kalibutan nga Badbad nagagamit sang simple lang nga lenguahe, gani maintiendihan ini sang tanan nga bumalasa, pati sang mga pamatan-on. Sigurado nga mangin suod pa gid ang mga bumalasa sini sa ila Amay sa langit nga si Jehova.”

Sang una, ang mga manugbantala nga nagahambal sang Nzema nagagamit sang Biblia nga ginbalhag sang Bible Society of Ghana. Pero gindula sini nga translation ang ngalan sang Dios kag mabudlay ini intiendihon. Kag bangod mahal ang mga Biblia sa Ghana, ang iban nga manugbantala indi makabakal sini.

Pero mabasa sa Bag-ong Kalibutan nga Badbad sa Nzema ang ngalan sang Dios nga Jehova, mahapos ini intiendihon, kag libre lang. Magamit ini nga Biblia sang 1,532 ka manugbantala nga nagahambal sang Nzema sa teritoryo sang branch sa Ghana sa ila pagbantala sa mga 330,000 ka tawo sa sini nga lenguahe.

Kabay pa nga ang aton mga kauturan magakalipay sa “kasuguan ni Jehova” paagi sa sining bag-o nga translation sang Biblia.—Salmo 1:1, 2.