Ang Mayo 25, 2023, amo ang ika-30 nga anibersaryo sugod sang ginhimo sang European Court of Human Rights (ECHR) ang ginatawag sang mga abogado nga isa sa pinakaimportante nga desisyon. Amo ini ang desisyon sa kaso nga Kokkinakis v. Greece, kay sa una nga tion may gindeklarar ang ECHR nga pungsod nga naglapas sang kahilwayan sa pagsimba. Sugod sang 1993, ini nga desisyon amo ang nangin basihan sang mga kinamatarong sa relihion sang 46 ka pungsod nga miembro sang Council of Europe. Kon may pila ka gamhanan nga mga pungsod subong, pareho sang Russia, nga nagatinguha nga dulaon ang aton kahilwayan sa pagsugid sang aton ginapatihan sa iban, ang desisyon sa kaso nga Kokkinakis amo ang ginagamit nga basihan sang ECHR.

Subong, ginagamit sang opisyal nga website sang Council of Europe ang kaso nga Kokkinakis sa ila pagpaathag sang proteksion nga ginahatag sang European Convention on Human Rights. Ini nga kaso ginatudlo man sa mga law school kag ginasambit sa mga pag-apelar sa European Court.

Kilala gid ang desisyon sa kaso nga Kokkinakis kay ginapakita sini nga “kon ang isa kumbinsido gid sa mga ginapatihan sang iya relihion, natural lang nga ipakita niya ini sa iya ginahambal kag ginahimo.” Ginsuportahan man sini nga ang “kahilwayan sa pagsugid parte sa relihion sang isa . . . nagalakip sang kinamatarong nga kumbinsihon ang pareho niya nga tawo, halimbawa paagi sa ‘pagpanudlo.’”

Si Judge De Meyer, nga isa sa siam ka judge sang ECHR nga nag-uyat sini nga kaso, nagpaathag sang iya opinyon: “Ang proselitismo, nga ang buot silingon ‘kapisan sa pagsugid sang ginapatihan,’ indi isa ka krimen: kundi isa ka normal nga paagi sang ‘pagsugid parte sa relihion [sang isa].’”

Gintapos sining importante nga desisyon ang 50 ka tuig nga pagpakigbato ni Brother Minos Kokkinakis sa sini nga kaso. Gin-aresto sang mga awtoridad si Minos sa Greece sang 1938 bangod sa paglapas sa kasuguan nga ginhimo sang Griego nga diktador nga si Ioannis Metaxas nga ilegal ang “proselitismo” ukon pagsugid sa iban parte sa relihion. Si Minos nga 30 anyos sadto nga tion, amo ang una sa 19,147 ka Saksi ni Jehova nga gin-aresto halin sang 1938 asta 1992 bangod sini nga kasuguan. Sa sini nga mga tinuig, ang mga Saksi ni Jehova gin-harass, ginmaltrato, kag ginpintasan.

Wala nahadlok sa sini si Minos gani nagpadayon sia sa pagbantala. Bangod sini, sobra 60 ka beses sia nga gin-aresto, 18 ka beses nga ginpaatubang sa mga korte sa Greece, kag sobra anom ka tuig sia sa prisuhan ukon sa mga isla diin sia gintapok, kag kinahanglan niya magbayad sing multa.

Sang 1993, gindeklarar sang ECHR nga wala sing sala si Minos, nga 84 anyos sina nga tion. Nagdesisyon man ang korte nga ginlapas sang Greece ang iya kahilwayan sa pagsimba. Nagmando ang ECHR nga bayaran sang danyos ang mga tinuig sang pag-antos ni Minos kag ang tanan niya nga gingasto sa mga kaso. Sa Crete nag-istar si Minos asta nga napatay sia sang 1999 sa edad nga 90.

Si Judge De Meyer nagsiling nga si Minos indi isa ka kriminal kundi “ginsentensiahan lamang nga guilty bangod sang iya kapisan sa iya relihion, bisan pa nga wala sia sang nahimo nga bisan ano nga sala.”

Ginpaathag ni Philip Brumley, nga General Counsel sang mga Saksi ni Jehova, kon ano ka importante ini nga desisyon para sa mga kaso subong. Sia nagsiling: “Ginpamatud-an sang desisyon sa kaso nga Kokkinakis ang kinamatarong sa pagsugid sang ginapatihan sang isa sa malinong nga paagi.” Ini nga desisyon pirme gid ginsambit kag amo ini ang pinakaimportante nga desisyon sang ECHR parte sa kahilwayan sa pagsimba bisan sa mga lugar nga indi sakop sang Europe.”

Daku gid ang kadalag-an sang kaso nga Kokkinakis kag nangin sulundan ini sang iban nga mga kaso. Gani ginpasalamatan gid naton si Jehova. Ginapasalamatan man naton sia bangod sang iya kaalam kag paggiya samtang padayon naton nga ‘ginapangapinan kag legal nga ginapamatud-an ang maayong balita.’—Filipos 1:7.