Otsenta ka tuig na ang nagligad, si Minos Kokkinakis gintapok sa isa ka isla sa Greece nga ginatawag Amorgós sa Aegean Sea, kag nagtener sia diri sing 13 ka bulan. Si Brother Kokkinakis ginsentensiahan bisan pa wala sia mabista bangod sa paglapas sa kasuguan nga nagadumili sang pagpangumbertir. Sia ang una sa 19,147 ka Saksi ni Jehova nga gin-aresto halin sang 1938 asta sang 1992 bangod sa paglapas sa kasuguan nga ginhimo sang Griego nga diktador nga si Ioannis Metaxas. Sa sulod sini nga mga tinuig, ginatos ka Griego nga mga Saksi ang maisog nga nagpadayon sa pagbantala bisan pa ginakastigo sila, ginaaresto, kag ginapriso.

Mga 30 anyos si Brother Kokkinakis sang ginsugdan niya ang 50 ka tuig nga pagpakigbato para sa kahilwayan nga mapaambit ang iya ginapatihan. Sobra 60 ka beses sia nga gin-aresto kag sobra anom ka tuig sia sa mga prisuhan kag sa mga isla nga ginabutangan sang mga priso, diin gin-antos niya kag sang iban pa nga Saksi ang grabe nga kabudlayan. Sa edad nga 77, gin-aresto sia sa katapusan nga tion, kag gin-apelar niya ini sa korte, pero napierde sia liwat. Gani, ginpasaka niya ang iya kaso sa Supreme Court of Greece. Nagpasaka man sia sing kaso sa European Court of Human Rights (ECHR), bangod wala ginkilala sang Greece ang iya kahilwayan sa pagsimba. Sang 1993, nagdaug gid man sa kaso si Minos Kokkinakis sa edad nga 84, kag sa una nga tion gindeklarar sang ECHR ang isa ka pungsod nga nakasala sang paglapas sang kahilwayan sa pagsimba. * Ang tuig 2018 ang ika-25 nga anibersaryo sining importante katama nga desisyon. Suno sa isa ka propesor parte sa kasuguan, ang kaso nga Kokkinakis “mahimo amo ang pirme gid ginabasihan nga desisyon sang European Court of Human Rights kon parte sa kahilwayan sang relihion kag pagpati.”

Ang desisyon sa Kokkinakis nangin basihan sang mga kaso nga pareho man sini. Importante gihapon ini subong bangod ang gamhanan nga mga pungsod pareho sang Russia, nagapanikasog nga kuhaon ang kahilwayan sa pagsimba sang aton mga kauturan.

Ang pagtuo kag katutom ni Brother Kokkinakis sa iya ministeryo isa ka dalayawon nga halimbawa para sa aton mga kauturan nga ginahingabot bangod sa ila pagbantala. Ang iya integridad isa ka mabaskog nga panaksi nga madumduman gihapon asta subong.—Roma 1:8