Sang Mayo 2019, ginpasugtan sang mga awtoridad sa Guatemala ang aton mga kauturan nga tudluan sang Biblia ang mga pulis kag mga bombero. Subong, 450 na ka bombero kag pulis ang nakatambong sa sini nga mga workshop, nga ginhiwat sa mga siudad sang Coatepeque, Colomba Costa Cuca, Malacatán, kag San Rafael Petzal.

Si Juan Carlos Rodas, nga isa ka gulang nga nagatudlo sa sini nga mga workshop, nagsiling: “Sa sulod sang sobra 15 na ka tuig, ang mga Saksi ni Jehova nagatudlo sang Biblia sa mga priso sa tatlo ka sarisari nga prisuhan sa Guatemala. Natalupangdan sang mga opisyal nga nagabag-o ang batasan sang mga priso nga ginatudluan naton sang Biblia. Gani ginrekomendar nila nga tudluan man sang Biblia ang mga pulis kag ang mga bombero.”

Sa pagdumala sang branch sa Central America, ginahimo ini nga mga workshop duha ka beses sa isa ka semana kag nagalawig sing mga 15 ka minutos. Nagatudlo sila sang mga topiko pareho sang kon paano mangin mas maayo ang relasyon sa iban, kon paano gamiton sing insakto ang awtoridad, kag kon paano magbuligay bilang isa ka team. Ang mga brother nga nagatudlo nagatanyag man sang mga literatura, nagapatan-aw sang mga video sa aton website, kag nagatudlo kon paano mangita sang mga impormasyon sa JW Library app.

Pribilehiyo gid sang mga Saksi ni Jehova nga tudluan ang mga pulis kag bombero. Kabay nga padayon sila nga makabenepisyo sa praktikal nga kaalam nga mabasa sa Biblia.—2 Timoteo 3:16.