Sang Nobiember 17, 2023, ang Bag-ong Kalibutan nga Badbad Sang Cristianong Griegong Kasulatan gin-release sa Konkani (Roman). Nangin available dayon ang digital nga pormat pagkatapos sini nga release sa 413 nga nag-attend sa 2023 “Mangin Mapinasensiahon”! nga Rehiyonal nga Kombension sa Margao, India. Ang naimprinta nga kopya sini nga Biblia mangin available pa sa palaabuton.

Ang Konkani ginahambal sang sobra tatlo ka milyon ka tawo nga nagaistar sa west coast sang India kag ginsulat sa lima ka sarisari nga alphabet. Ang Konkani (Roman) nga alphabet ginagamit sang mga 500,000 ka tawo nga nagaistar sa state sang Goa, India. Subong, sobra 400 ka manugbantala ang nagaalagad sa pito ka kongregasyon nga nagahambal sang Konkani (Roman). Antes sini nga release, isa lang ang translation sang Biblia nga available sa Konkani (Roman).

Mas madali maintiendihan ang mga kinaiya ni Jehova kay naggamit ining bag-o nga translation sang moderno kag detalyado nga lenguahe. Ang isa ka brother nagsiling: “Ang translation nga ginagamit namon sadto nag-translate sang ginsiling ni Jesus sa Juan 21:17 nga ‘pahalba ang akon mga karnero.’ Pero sa Bag-ong Kalibutan nga Badbad, gin-translate ini nga ‘pahalba ang akon magagmay nga mga karnero.’ Nakabulig ini nga mga tinaga nga mabatyagan ko kon paano kita ginaatipan ni Jehova kag ni Jesus sing mapinalanggaon.”

Nagapasalamat gid kita kay Jehova sa sining bag-o nga translation. Nagasalig kita nga madamo pa ang makatuon sang iya matahom nga mga kinaiya kag gusto mangin abyan niya.—Salmo 25:14.