Sang Marso 27, 2022, ang Konkani nga bersion sang Ang Biblia—Ang Ebanghelyo Suno kay Mateo gin-release sa Roman script. Ang ginrekord na nga daan nga programa ginpresentar sa mga 600 ka tumalambong. Ang libro sang Mateo puede na dayon nga ma-download sa sarisari nga digital format. Ang naimprinta nga kopya sini mangin available sa katapusan sini nga tuig.

Ang Konkani isa sa 23 ka opisyal nga lenguahe sa India. Kalabanan nga gahambal sini nga lenguahe ara sa katundan nga baybayon sang India. Ang mga Saksi ni Jehova nagsugod sa pagbantala sa mga nagahambal sang Konkani sang 1957 sang may gin-asayn diri nga mga espesyal payunir. Ang una nga kongregasyon sa Konkani natukod sang 1959.

Diutay lang nga mga bersion sang Biblia ang mabasa sa Konkani antes sang 1974. Sina nga tuig, ang Konkani nga translation sang Cristianong Griegong Kasulatan nangin available sa publiko. Sang 2006, ang Konkani nga translation sang Hebreong Kasulatan nangin available man. Pero, ining duha ka translation nagaunod sang indi pamilyar nga mga tinaga para sa mga nagahambal sang Konkani.

Nakabenepisyo ang mga kauturan sa mga gamit sa pagpanudlo nga ginhimo sang mga Saksi ni Jehova sa Konkani nga lenguahe. Pero wala sang sibu nga translation sang Biblia nga magamit ang mga kauturan. Halimbawa, ang isa ka translator nagsiling: “Sa translation sang Biblia nga ginagamit namon sadto, amo sini ang ginasiling sa Mateo 6:33: ‘Ang paglakat suno sa mga kasuguan sang Ginharian sang Dios kag ang paghimo sang makapalipay sa iya amo ang aton dapat gid kabalak-an.’ Pero subong, mas maathag na kag mas mahapos intiendihon ang bag-o gin-release nga libro sang Mateo.”

Ang isa pa ka translator nagsiling: “Bisan pa nga diutay lang nga mga kauturan ang nagahambal sini nga lenguahe kon ikumparar sa iban nga lenguahe, ginapakita sang pag-release sining libro sang Bag-ong Kalibutan nga Badbad sa amon lenguahe nga nagaulikid gid si Jehova sa aton tanan.”

Nagasalig gid kita nga ining bag-o nga translation magamit gid sang mga kauturan nga nagahambal sang Konkani sa ila padayon nga pagbulig sa mga tawo nga magpalapit kay Jehova.—Juan 6:44.