Pareho sa gin-report sa breaking news sa jw.org, may pila ka bomba nga naglupok sa isa ka rehiyonal nga kombension nga ginhiwat sa Kerala, India, sang Domingo, Oktubre 29, 2023. Nasubuan kita nga dugang sa duha ka sister nga napatay gilayon sa paglupok, isa ka 12 anyos nga bata nga babayi ang napatay man bangod sa iya mga pilas. May 55 pa ka kauturan ang nasamaran, lakip na ang pila nga may malala nga paso sa lawas.

Subong, may ara tatlo ka sister kag duha ka brother nga ara pa sa ospital kag kritikal ang ila kondisyon. Ginkompirmar sang mga awtoridad nga indi magnubo sa tatlo ka bomba ang ginpalupok sa tion sang nagabukas nga pangamuyo sang mga 9:40 sa aga. Ang suspek sa sining pagpamomba naaresto na, kag padayon ang imbestigasyon.

Nagapasalamat kita sa mga emergency personnel nga nag-abot dayon sa lugar sang kombension para magbulig kag sa mga empleyado sang ospital nga nag-atipan sa mga nasamaran.

Ang mga nag-attend nagapasalamat kag napalig-on sang gugma kag suporta nga ginpakita sang pareho nila nga mga Saksi. Ang isa ka sister nga ara sa auditorium sang naglupok ang bomba nagsiling: “Nangamuyo ko dayon kay Jehova. Ang mga attendant, kag ang iban pa nga brother, nagbulig gid sa amon kag ginsigurado nila dayon nga safe kami. Ginpakita sini ang gugma kag pag-ulikid ni Jehova sa kada isa sa amon.”

Padayon nga nagahatag sing paumpaw halin sa Biblia kag praktikal nga bulig ang mga representante sang branch office sa India, mga manugtatap sang sirkito, kag mga gulang didto sa mga naapektuhan. Ang isa ka gulang halin sa branch office nga nagbiyahe pakadto sa Kerala para paumpawan ang mga kauturan nga naapektuhan sang pagpamomba nagsiling: “Bisan pa sang grabe nga kakulba, kasakit, kag trauma sang mga utod, napalig-on gid ako kay positibo gihapon ang mga kauturan nga nasamaran. Naistorya ko ang madamo sa ila. Sang nakita ko kon paano sila nagasalig kay Jehova, napabakod gid ang akon pagtuo.”

Bilang mag-ulutod sa bilog nga kalibutan, ginapangamuyo naton ang mga pamilya sang mga biktima kag ang tanan nga apektado sining grabe nga trahedya sa India. Napaumpawan kita kag kalmado gihapon bangod sa promisa sang Biblia nga isa ka palaabuton nga wala na sing kapintas, pag-antos kag kamatayon. Determinado kita gihapon nga padayon nga magsalig sing bug-os kay Jehova.—Salmo 56:3.