Suno sa balita, indi magnubo sa 169 ang napatay bangod sa baha sa katundan sang India, sa mga estado sang Gujarat, Maharashtra, Karnataka, kag Kerala.

Ang sanga sa India nagreport nga wala sing kauturan naton nga napatay ukon nasamaran sa sini nga pagbaha. Ari ang dugang pa nga report sang sanga.

Gujarat: Sa siudad sang Vadodara, 145 ka manugbantala ang apektado sang baha. Wala naapektuhan ang remote translation office sang Gujarati nga nahamtang man sa Vadodara.

Maharashtra: Sa Mumbai, ginbahaan ang balay sang anom ka pamilya. Sa siudad sang Sangli, nga mga 378 ka kilometro sa bagatnan-sidlangan sang Mumbai, 25 ka manugbantala ang nagbakwit kag nagdayon lang sila anay sa balay sang kauturan sa kaingod nga siudad.

Karnataka: Anom ka pamilya ang nagbakwit. Ari diri ang sanga talatapan pero wala ini naapektuhan sang mabaskog nga pag-ulan kag pagbaha.

Kerala: Mga 100 ka pamilya ang nagbakwit sa mas mataas nga lugar kag nagadayon sila subong sa balay sang iban nga kauturan. Ginausisa na sang Disaster Relief Committee ang sitwasyon.

Nagapanghikot ang sanga talatapan para mabuligan ang apektado nga mga lugar. Ang mga manugtatap sang sirkito kag ang mga field personnel sang Local/Design Construction nagabuligay man para mahibaluan ang sitwasyon kag mabuligan ang apektado nga kauturan. Lakip sa sini ang pag-aman sing tubig nga ilimnon kag espirituwal nga pagpalig-on.

Ginapangamuyo naton ang padayon nga pag-alay-ay ni Jehova sa aton kauturan nga ginbahaan. Ginahulat na gid naton ang tion nga wala na sing kalamidad kag mangin ‘bugana na ang paghidait.’—Salmo 37:11.