NOBIEMBRE 17, 2023 | UPDATED: DISIEMBRE 8, 2023
INDIA
Update—Walo Na ang Napatay Bangod sa Pagpamomba sa India
Sang Sabado, Disiembre 2, 2023, ang 76 anyos nga brother nga isa ka elder kag regular payunir napatay bangod sa iya mga pilas sa natabo nga pagpamomba sa Kerala, India. Pagligad sang lima ka adlaw, sang Huebes, Disiembre 7, ang iya pinalangga nga asawa nga isa man ka regular payunir, napatay bangod sa iya mga pilas nga resulta sang pagpamomba. Sa kabilugan, walo na sa aton mga kauturan ang napatay bangod sa sining malain nga hitabo.
Sang Domingo, Oktubre 29, 2023, may pila ka bomba nga naglupok sa isa ka rehiyonal nga kombension nga ginhiwat sa Kerala, India. Nasubuan kita nga isa pa ka brother kag duha ka sister ang napatay dugang sa tatlo nga napatay sa una nga report. Lakip sa ila ang nanay kag utod nga lalaki sang 12 anyos nga bata nga babayi nga una nga ginbalita nga napatay. Dugang pa, 11 ka kauturan ang ara pa sa ospital.
Para paumpawan kag palig-unon ang mga naapektuhan sini nga pagpamomba, gin-aprobahan ang branch sa India nga maghiwat sang isa ka espesyal nga miting sang Nobiembre 4, 2023. Gin-agda ang mga kauturan halin sa 21 ka kongregasyon nga naasayn sa kombension nga naapektuhan sang pagpamomba. Ang programa ginpresentar sa isa ka Kingdom Hall sa sina nga lugar nga halos 200 ang nag-attend. Mga 1,300 ang nagkonek sa programa paagi sa videoconference, kag ginrekord ang programa para sa mga ara pa sa ospital. Ginbinagbinag sang isa ka elder halin sa branch office ang Salmo 23:1 kag ginpadaku niya ang pag-ulikid ni Jehova sa kada isa sa iya mga alagad: “Sa sini nga bersikulo, wala ginsiling sang salmista nga si Jehova isa ka manugbantay ukon manami gid nga manugbantay. Gintawag sang salmista si Jehova nga ‘akon manugbantay.’ Makapaumpaw gid mabal-an nga si Jehova interesado gid sa kada isa sa aton!”
Mga sister nga mapinalanggaon nga nagapaumpaw sa kada isa
Ang isa ka brother nga ara sang natabo ang pagpamomba nagsiling nga indi sia makatulog. Bisan pa sina, nagboluntaryo sia sa pagbulig sa mga ara pa sa ospital. Nagsiling sia: “Sang nakita ko ang ila pagtuo kag positibo nga panimuot, nakabulig ini sa akon nga malipatan ang akon mga kabalaka. Bisan pa sa ila mga pilas kag kasakit nga nabatyagan, madamo ang malipayon nga nagakanta sang mga ambahanon sa Ginharian.” Ang isa pa ka brother nagsiling: “Basi madugayan pa antes makabalik sa normal nga rutina ang iban sa ila. Pero, nabal-an ko nga padayon gid sila nga palanggaon sang aton mga kauturan. Nagasalig ako nga ang aton nagaulikid nga Dios magauyat sang kada isa sa ila sa iya gamhanan nga kamot. Makapalig-on gid ini!”
Bilang isa ka nahiusa nga pamilya, napaumpawan kita kag napasalig kay nabal-an naton nga si Jehova padayon nga ‘magaayo sa mga buong sing tagipusuon kag magabugkos sa mga pilas’ sang aton pinalangga nga mga kauturan sa India.—Salmo 147:3.