Sugod sang 1905, may mga Saksi ni Jehova na sa India. Sang 1926, may opisina sila sa Bombay (subong Mumbai), kag narehistro sila sang 1978. Nakabenepisyo gid ang mga Saksi sa konstitusyon sang India nga nagalakip sang kinamatarong nga maghimo, magsugid, kag magpalapnag sang pagtuo sang isa. Ang ila pagdaug sa kaso nga Bijoe Emmanuel v. State of Kerala sa Supreme Court sang India, nakabulig para mabaton sang tanan nga pumuluyo ang mga kahilwayan base sa konstitusyon. Hilway sa pagsimba ang mga Saksi ni Jehova sa India. Pero sa pila ka lugar, nangin biktima sila sang pagpang-atake sang mga grupo kag sang iban pa nga pagpamintas bangod sa relihion.

Sang 1977, nagsiling ang Supreme Court nga ang pagpalapnag sang relihion lain sangsa pagpangumbertir. Nagpanindugan ang korte nga wala sang bisan sin-o nga may kinamatarong nga kumbertiron ang iban kag nagsiling pa ini nga legal ang tanan nga kasuguan kontra sa pagpangumbertir. Gani kon mag-atubang sa mga pulis, ginagamit sang mga grupo ang ginsiling sang korte kag nagabinutig sila nga nadakpan kuno nila ang mga Saksi nga nagapangumbertir. Sa mga lugar naman nga wala sang kasuguan parte sa pagpangumbertir, ginaakusar sang mga manugpamatok sing pagpasipala ang mga Saksi. Ginabase nila ini sa isa ka sugo sang ginsakop pa sadto ang pungsod kag gin-aplikar ini sa pagbantala sang mga Saksi ni Jehova. Bilang resulta, gin-atake sang mapintas nga mga grupo ang mga Saksi ni Jehova sing sobra 150 ka beses sugod sang 2002. Naglala pa gid ini kay indi maproteksionan sang mga awtoridad ang mga biktima kag wala man nila nasilutan ang mga nagapang-atake.

Padayon nga nagapakig-istorya ang mga Saksi ni Jehova sa India sa mga opisyal sang gobierno kag nagapangabay sa mga korte nga proteksionan ang ila kinamatarong nga hilway nga mahimo ang mga hilikuton sang ila relihion. Ginapaabot sang mga Saksi nga sundon sang mga awtoridad kag sang mga tawo ang ginsiling sang Supreme Court sa Bijoe case: “Ang aton tradisyon nagatudlo sing pagkamatinuguton; ang aton pilosopiya nagatudlo sing pagkamatinuguton; ang aton konstitusyon nagabuhat sing pagkamatinuguton; indi naton pagbayluhan ini.” Ginapaabot sang mga Saksi nga paagi sa ila pagpanikasog mauntat na ang pagpang-atake sang mga grupo kag mangin malinong na ang ila pagsimba.